Серік Сәпиев пен орынбасары қызметінен босатылды

Ресми мәліметке сәйкес, Қарағанды облысының Дене шынықтыру және спорт басқармасының басшысы Серік Сәпиев пен оның орынбасары Дәурен Есімханов өз еркімен қызметтен кеткен.

– Қарағанды облысының Дене шынықтыру және спорт басқармасында ведомство басшысы Серік Сәпиев пен оның орынбасары Дәурен Есімханов өз еркімен атқарып отырған лауазымдарынан босатылды, – делінген әкімдік хабарламасында.

Еске салайық, 23 қаңтар күні бұқаралық ақпарат құралдары мен әлеуметтік желілерде Серік Сәпиевті өз орынбасары соққыға жыққаны туралы ақпарат тараған болатын.

Кейінірек Қарағанды облысы Полиция департаментінің баспасөз қызметі оқиғаға қатысты түсініктеме берді. Ведомство мәліметінше, 21 қаңтарда қаладағы спорт кешендерінің бірінде екі ер адам арасында жанжал шыққан.

– Қарағанды қаласының 42 жастағы тұрғынының арызы негізінде ұрып-соғу дерегі бойынша қылмыстық іс қозғалды, – деп хабарлаған еді полиция.