Жетісу облысындағы «Үшарал – Достық» тас жолында болған жол-көлік оқиғасы кезінде тәртіп сақшылары көріну қашықтығының нашарлау жағдайында адамдарды құтқарды, – деп хабарлайды 7-su.kz ақпараттық порталы.
2026 жылғы 5 ақпанда өңірде ауа райы күрт бұзылып, «Үшарал – Достық» автожолының 84-шақырымында қатты жел мен қарлы боран басталды. Салдарынан жол көрінбей, көлік қозғалысы нашарлады. Мамандар жолды уақытша жабу туралы шешім қабылдағанымен, сол сәтте «102» арнасына шұғыл қоңырау түсті.
Жолдың 99-шақырымында бораннан жол-көлік оқиғасы орын алды. Алдын ала мәлімет бойынша, жүк көлігінің жүргізушісі басқаруға ие бола алмай, алдымен «Hyundai Elantra» көлігімен соқтығысқан. Соққыдан кейін тоқтап тұрған көліктерге «Chevrolet Cobalt» келіп соғылды. Айнала тас қараңғы қар жамылғысына айналған сәтте, бұл апат адам өміріне үлкен қауіп төндірді.
Оқиға орнына №43 патрульдік экипажы – полиция аға лейтенанттары Еркін Ұлдаханов пен Асет Тезекбаев жедел жетті. Полицейлер қауіпті аймақта қалып қойған жолаушылар жедел түрде қауіпсіз жерге шығарды. Барлығы 6 адам ажал аузынан аман қалды. Зардап шеккендердің бірі бірден жедел жәрдем мамандарына тапсырылды.
Қиын сәтте көмекке келген полицейлерге жолаушылар шексіз алғыстарын білдіріп жатыр. Бұл жағдай құқық қорғау органдары қызметкерлерінің кез келген уақытта халықтың қауіпсіздігі үшін басын қатерге тігуге дайын екенін тағы бір мәрте дәлелдеді.
