Бүгін қазақ музыка өнерінің көрнекті өкілі, белгілі композитор Кеңес Дүйсекеевтің туғанына 80 жыл толды, – деп хабарлайды 7-su.kz ақпараттық порталы turkystan.kz сайтына сілтеме жасап.
Кеңес Дүйсекеев 194 6 жылғы 10 ақпанда Қызылорда облысында дүниеге келген. Ол әр жылдары «Гүлдер» ансамблінің бас дирижері әрі музыка жетекшісі, «Қазақконцерт» бірлестігінің көркемдік жетекшісі, сондай-ақ Қазақ телевизиясы музыка редакциясының бас редакторы қызметтерін атқарды.
Композитор ұлттық эстрада мен симфониялық музыкада өзіндік қолтаңбасын қалыптастырып, қазақ ән өнерінің дамуына елеулі үлес қосты. Оның шығармалары қазақ музыкасын жаңа көркемдік деңгейге көтеріп, кең тыңдарман қауымның ықыласына бөленді.
Кеңес Дүйсекеев – «Толғау» симфониясының, «Жалаңтөс батыр» симфония поэма-картинасының, «О, дүние» кантатасының, «Жыл мезгілдері» романстар циклінің, «Мәди» және «Аққу Жібек» мюзиклдерінің, «Алдар көсе» опереттасының, сондай-ақ тыңдарман жүрегінен берік орын алған 200-ден астам әннің авторы.
