2026 жылдың 6 ақпанында Талдықорған қаласында Қазақстан Республикасы Жеке құрамды атқыштар батальонының Тәжік–Ауған шекарасынан шығарылғанына 25 жыл толуына орай салтанатты іс-шара ұйымдастырылды, – деп хабарлайды 7-su.kz ақпараттық порталы.
Мерейтойлық шара таңғы сағат 10:00-де 5514 әскери бөлімінің аумағында басталып, әскери қызметшілер, ардагерлер, жергілікті атқарушы органдар өкілдері және қонақтар Тәжік–Ауған шекарасында ерлікпен қаза тапқандарды еске алып, мемориалға гүл шоқтарын қойды. Бұл рәсім жауынгерлердің Отан алдындағы борышын абыроймен атқарғанын, олардың ерлігі мен жанқиярлығын ұмытпауға арналған тағзым белгісі болды.
Салтанатты жиында бөлім командирі мен шақырылған қонақтар сөз сөйлеп, шекаралық миссияға қатысқан сарбаздардың әскери қызметі мен батылдығын ерекше атап өтті. Ардагерлер өз естеліктерімен бөлісіп, жас ұрпаққа патриоттық рух берді.
Шараның екінші бөлімі сағат 11:00-де Өтенай ауылдық округінің Мәдениет үйінде жалғасты. Мұнда мерекелік концерт ұйымдастырылып, әскери оркестр мен жергілікті өнерпаздар өнер көрсетті. Концерт бағдарламасында патриоттық әндер мен сахналық қойылымдар ұсынылды.
Бұл іс-шара тек тарихи датаны атап өту ғана емес, ел тыныштығы жолында қызмет еткен жауынгерлерге құрмет көрсету, олардың ерлігін кейінгі буынға үлгі ету мақсатында ұйымдастырылды. Қазақстан Республикасының қауіпсіздігі мен бейбітшілігі жолында қызмет еткен әскери қызметшілердің еңбегі әрдайым ұмытылмайды.
