Италияның Милан және Кортина-д’Ампеццо қалаларында өтіп жатқан қысқы Олимпиада ойындарының төртінші күні Қазақстан құрамасы үшін тартысты болмақ, – деп хабарлайды 7-su.kz ақпараттық порталы.
Бүгін, 10 ақпанда отандық спортшылар шаңғы жарысы, шорт-трек, фристайл-могул, биатлон және мәнерлеп сырғанау сияқты бес спорт түрінен бақ сынайды. Жарыс кестесі Астана уақытымен берілген.
Күндізгі сағат 13:15-те шаңғыдан әйелдер арасында еркін стильдегі спринт жарысы басталады. Бұл сында ел намысын Надежда Степашкина, Ксения Шалыгина, Анна Мельник және Дарья Ряжко қорғайды. Одан кейін сағат 13:55-те ерлер арасындағы спринтте Әмірғали Мұратбеков, Виталий Пухкало және Наиль Башмаков сынға түседі.
Фристайл-могулдан еліміздің басты үміттерінің бірі Павел Колмаков өнер көрсетсе, әйелдер арасында Аяулым Әміренова, тәжірибелі Юлия Галышева және Анастасия Городко жолға шығады.
Шорт-трек шеберлері де бүгін іріктеу кезеңдерін өткізеді:
-
Әйелдер (500 метр): Яна Хан мен Ольга Тихонова.
-
Ерлер (1000 метр): Денис Никиша.
-
Аралас эстафета: Денис Никиша, Абзал Әжіғалиев, Яна Хан және Ольга Тихонова мұз айдынына шығады.
Кешкі сағат 17:30-да биатлоннан ерлер арасындағы жекелей жарыс басталады. Мұнда Әсет Дүйсенов пен Владислав Киреев мергендік пен жылдамдық танытпақ. Ал жарыс күнін мәнерлеп сырғанаушы Михаил Шайдоров түйіндейді. Ол сағат 22:30-да қысқа бағдарламасын ұсынады.
Қысқы спорт түрлері бойынша Қазақстан құрамасының әлеуеті жылдан жылға артып келеді. Әсіресе шорт-трек пен фристайлдан біздің спортшылар әлемдік деңгейдегі үздік бестікке кіреді. Олимпиада ойындарындағы әрбір секунд пен әрбір ұпай маңызды.
Жарыстарды отандық спорт арналарынан тамашалай аласыздар.
