Жетісу облыстық полиция департаменті қызметкерлері прокуратураның үйлестіруімен ауқымды интернет-алаяқтықпен айналысқандардың заңсыз әрекетін әшкереледі.
Заңсыз схеманың ұйымдастырушысы Алматы қаласының 23 жастағы тұрғыны болып шықты. Ол алаяқтыққа қатысушылардың міндеттерін нақты бөліп отыратын жасырын call-орталық құрған.
Қылмыскерлер әлеуметтік желілер мен «Telegram» мессенджері арқылы әрекет етіп, «дроптар» деп аталатын адамдарды, сондай-ақ, ақшаны қолма-қол айналдыру қызметтерін пайдаланған. Қылмыскерлердің заңсыз әрекеті салдарынан 57 адам жәбірленген. Олардың ішінде кейбір жәбірленушілер бір миллион теңгеден асқан қаражатынан айырылған.
Келтірілген жалпы материалдық шығын 36 миллион теңгеден асқан. Қазіргі уақытта Қазақстан аумағында жүрген өзге де күдіктілерді анықтау және ұстау бойынша жұмыстар жүргізілуде. Қылмыстық іс материалдары сотқа жолданды.
Облыстық полиция департаменті қырағылық сақтауға, күмәнді қоңыраулар мен хабарламаларға сенбеуге және алаяқтық фактілері туралы күдікті ақпарат болса құқық қорғау органдарына дереу хабарлауға шақырады.
Айдар ҚАЛИЕВ
