Кербұлақ ауданы Ақжар мектебінде республика көлемінде ұйымдастырылған «Тұлғасы тұнған тәлім, Есімі елге мәлім» атты жоба аясында Ауған соғысы ардагерлерімен кездесу кеші өтті.
Шараға Алматы және Жетісу облысы Ауған соғысы ардагерлерінің төрағасы Матсерік Карабеков, Мақсат Есбатыров, Ауған соғысы ардагерлері мен мүгедектерінің республикалық үйлестіру кеңесінің төрағасы Сүгірәлі Ақжігітов бастаған 50-ге жуық ардагер қатысты. Бұл – он сегізінде от кешкен азаматтардың ерлігін дәріптеп, жастарға үлгі етуге бағытталған тағылымды басқосу болды.
2015 жылы бастау алған «Тұлғасы тұнған тәлім, Есімі елге мәлім» жобасы он жыл бойы жас ұрпаққа патриоттық тәрбие беруді жүйелі түрде жүзеге асырып келеді. Жоба арқылы мектеп оқушылары мен жастар ардагерлермен жүздесіп, олардың ерлік жолынан тағылым алады. Мұнда – тек кездесу емес, ұлттық құндылықтарды дәріптеу, ел тарихын ұмытпау, бейбіт өмірдің қадірін түсіну жолындағы үлкен қадам. Он жылдық қорытынды кешінде осы бағыттағы жұмыстардың нәтижесі айқын көрініс тапты.
Шарада ардагерлер соғыстағы оқиғаларын айтып, патриоттық әңгіме өрбітті. Сондай-ақ аталмыш жоба авторы Айым Асхатқызы елдік рухты дәріптеудегі еңбегі үшін «Алтын Жүрек» медалімен марапатталды.
Сандира ҚАСЫМҒАЛИ
ЖУ студенті
