Өткен жылы облыс бойынша тұтынушылардан 1242 өтініш түсті. Бұл туралы Бейсен Құранбек атындағы Журналистер үйінде өткен брифингте сауда және тұтынушылардың құқықтарын қорғау департаментінің басшысы Айдос Дауешов мәлім етті.
Спикердің айтуынша, өтініш жазушылар саны алдыңғы жылмен салыстырғанда өскен. Ең көп шағым бөлшек сауда, электрондық сауда және тұрмыстық қызметтерге қатысты болды. Осы орайда, 2024 жылы тұтынушыларға саудагерлерден 67 млн. теңгеден астам қаражат қайтарылды. Әлеуметтік маңызы бар азық-түлік бағаларының негізсіз өсуін анықтау үшін 143 тексеру жүргізілген. Сондай-ақ, 134 жоспардан тыс тексеруде заң бұзушылықтар анықталып, ескерту жасалып, айыппұл салынды. Тұтынушылардың құқықтарын қорғау бойынша жоспардан тыс 9 тексеру жүргізіліп, нәтижесінде 9 заң бұзушылық тіркелді.
2024 жылғы негізгі резонансты істер: «Омарсервис» ЖШС тұтынушыларға дұрыс қызмет көрсетпегені үшін сотқа берілді (12,7 млн. теңге). Сондай-ақ, «Ясина» ЖК сапасыз білім беру қызметі үшін сотқа тартылды. «Базарханов» ЖК алдын ала төлем қабылдап, тауарды жеткізбегені үшін ісі құқық қорғау орындарына хабарланды.
Әлеуметтік зерттеу қорытындысы бойынша облыста такси, ТКШ қызметтері мен электр энергиясын таратуға қанағаттанбайтындар қатары өскен. Тұтынушылардың 57 пайызы сауда жасау жағы өз құқықтарынан хабардар, ал 25 пайызы оған қызығушылық танытпайды. Сол үшін департамент мамандары кәсіпкерлер арасында тұтынушылардың құқықтарын қорғау бойынша түсіндіру жұмыстарын жүргізуді күшейтуде. Тұтынушылар үшін құқықтық білім беру және құқықтарын қорғау механизмдері туралы кеңінен ақпарат таратуда. Жауапты мемлекеттік органдармен бірлесе отырып, көлік, ТКШ, сауда салаларындағы бақылауды күшейту.
Бұл бағыттардағы жұмысты жетілдіру – тұтынушылардың құқықтарын қорғауды жаңа деңгейге шығаруға мүмкіндік береді.
Брифингте журналистер тарапынан «Жаңа-Сана» коммуналдық қызметіне байланысты сұрақтар қойылды. Оған жауап берген спикер бұл мәселе басқа да тұрғындар тарапынан қозғалып отырғанын, қазіргі таңда тексеру жүргізіліп жатқанын айтты. Департамент қызметкерлері болашақта халықпен байланысты күшейтіп, кәсіпкерлерге тұтынушылардың құқын сақтауда түсіндіру жұмыстарын жүргізетіндерін айтты.
Елдана Жетпісбаева,
ЖУ-дің гуманитарлық ғылымдар жоғары мектебінің студенті
