Өскеменде волейболдан әйелдер командалары арасында ел чемпионатының ІІІ үлкен тур ойындары өтіп жатыр. «Жетісу» өзінің үшінші кездесуінде «Ақтөбені» 3:0 (25:10, 25:11, 25:14) есебімен жеңді. Енді турдағы соңғы ойынын «Қуанышқа» (Солтүстік Қазақстан облысы) қарсы өткізеді,-деп хабарлайды 7-su.kz ақпараттық порталы.
«Ақтөбемен» болған ойында «Жетісу» сапынан бастапқы құрамда Мяо Ивэнь, Валерия Якутина, Ирина Кенжебаева, Дарья Шаргородская, Мадина Бекет, Мария Сырыгина, Кристина Аниконова және Мария Фролова шықты. Матчтың үздіктері (8 ұпайдан алды) – Кристина Аниконовамен (6 шабуыл, 2 тосқауыл) Мяо Ивэнь (1 эйс, 7 шабуыл). Одан кейінгі нәтижелі ойыншы Ирина Кенжебаева 7 ұпай (1 эйс, 6 шабуыл).
Ел чемпионатындағы антирекорд жоқ әлде ерекше құбылыс па, екі командада тайм-аут (ойын ортасында командалардың алатын үзілісі) алған жоқ. Тек «Жетісу» командасының бапкері Марко Гршич бір мәрте видеоқайталауға (челлендж) жүгінді.
«Жетісу»:
Шабуыл – 57 пайыз.
Тосқауыл – 5.
Эйс – 6.
«Ақтөбе»:
Шабуыл – 20 пайыз.
Тосқауыл – 3.
Эйс – 4.
– Бүгінгі кездесуде бапкеріміз айтқан тапсырманы толық орындай алдық деп айта аламын. Енді ертең болатын турдың басты ойынына дайындаламыз. Барлығы жақсы болады деген ойдамын, – деді «Жетісу» волейбол клубының ойыншысы Татьяна Никитина.
«Жетісу» волейбол клубы дәл қазір 20 ойыннан кейін 58 ұпаймен көш бастап тұр. Одан кейін 54 ұпай жинаған «Қуаныш» келе жатыр. Үштікті 43 ұпаймен «Берел» түйіндеп тұр.
