Италияда өткен Ақ Олимпиаданың тарихи қаһарманы Михаил Шайдоровтың жеңісі елді әлі де сүйіндіруде. Белгілі кәсіпкер Арсен Томский чемпионның әкесі әрі алғашқы бапкері Станислав Шайдоровқа Audi Q8 автокөлігін сыйға тартып, көпшіліктің ықыласына бөленді, – деп хабарлайды 7-su.kz ақпараттық порталы Sn.kz сайтына сілтеме жасап.
Кәсіпкер ақжолтай жаңалықты әлеуметтік желідегі парақшасында бөлісіп, Станислав Шайдоровтың ұлының жетістігі жолындағы қажырлы еңбегін ерекше атап өтті. Арсен Томскийдің айтуынша, алтын медальдің артында тек спортшының ғана емес, оны алғаш жетелеп әкелген жаттықтырушының темірдей тәртібі мен үлкен құрбандықтары жатыр.
Жеңіс жолындағы құрбандық
Осыдан бірнеше жыл бұрын Станислав Шайдоров ұлының спорттық мансабын жалғастыруына қаражат табу үшін өз көлігін сатуға мәжбүр болған. Кәсіпкер бұл оқиғаның өзіне өте жақын екенін айтты.
«Михаил әлемге өзінің өнерін көрсетіп, Қазақстан мен шетелде миллиондаған адамға шабыт сыйлады. Бірақ бұл алтын медальдің артында күнделікті еңбек пен өзін-өзі құрбан етуге толы ұзақ жылдар жатқанын білу қажет. Станислав ұлының шыңға жету жолын қолдау үшін өз көлігін сатқан еді. Мен де кезінде команданың жалақысын төлеу үшін және киберспортшыларды жарысқа жіберу үшін екі рет көлігімді сатқанмын», – деді Арсен Томский.
Көз жасы мен шынайы ризашылық
Темір тұлпарды табыстау сәтінде Станислав Александрович толқынысын жасыра алмай, көз жасына ерік берді. Бұл – ұлының Олимпиада шыңын бағындырғанын көріп, көпжылдық еңбегінің жанғанына куә болған әкенің шынайы тебіренісі еді. Көліктің кілтін тапсыру рәсімі өте қарапайым әрі әсерлі жағдайда өтті.
Арсен Томский өз жазбасында әрбір чемпионның артында оған сенім білдіретін адам тұратынын, ұлы жеңістердің бастауында осындай берік сенім жататынын қадап айтты. Бұл оқиға қазақстандық спорттағы еңбектің еленетінін және чемпиондарды өсірген бапкерлер мен ата-аналардың қашанда құрметке лайық екенін тағы бір мәрте дәлелдеді.
Посмотреть эту публикацию в Instagram
