Көксу ауданында тұрғындарды баспанамен қамтамасыз ету бағытындағы жұмыстар жүйелі түрде жалғасуда. Осы ретте аудан орталығында тұрғын үй кезегінде тұрған 7 отбасыға жаңа тұрғын үйлердің кілттері салтанатты жағдайда табысталды, – деп хабарлайды 7-su.kz ақпараттық порталы
Іс-шараға Көксу ауданы әкімі Дәулет Кенжеханұлы қатысып, қоныс иелерін қуаныштарымен құттықтады. Сонымен қатар, «Amanat» партиясының аудандық филиалының төрағасы Мәлік Аманбайұлы да жылы лебізін білдіріп, жаңа баспананың әр отбасы үшін береке мен тұрақтылықтың бастауы болуына тілектестігін жеткізді.
– Балпық ауылдық округі, Балпық би ауылы бойынша – 4 үй;
– Еңбекші ауылдық округі, Зылиха Тамшыбай ауылы бойынша – 1 үй;
– Лабасы ауылдық округі, Жамбыл ауылы бойынша – 2 үй берілді.
Аталған баспаналар тұрғын үй кезегінде тұрған әлеуметтік осал санатындағы азаматтарға табысталды.
Салтанатты жиында сөз сөйлеген аудан басшысы соңғы жылдары аудан көлемінде тұрғын үй құрылысы қарқынды жүргізіліп жатқанын атап өтті. Оның айтуынша, 2022-2024 жылдар аралығында ауданымызда 188 отбасы баспаналы болып, жаңа қонысқа ие болған. Биыл әлеуметтік осал санатындағы отбасылар үшін 90 жеке тұрғын үйдің құрылысы аяқталып отыр. Жыл соңына дейін кезекте тұрған азаматтарға бұл үйлер кезең-кезеңімен табысталатын болады.
Шара барысында 2016 жылы тұрғын үй кезегіне тұрған, толық емес отбасы санаты бойынша баспана алған Белова Весняна сөз алып, өз қуанышымен бөлісті. Ол мемлекет тарапынан көрсетілген қолдау мен қамқорлық үшін аудан басшылығына алғысын білдіріп, бұл күнді ұзақ жылдар күткенін айтты.
– Бұл – менің отбасым үшін ерекше күн. Балаларымның өз шаңырағы бар екеніне қуаныштымын. Осындай мүмкіндік жасағандарыңыз үшін шын жүректен алғыс білдіремін, – деді ол.
Аудан көлемінде халықтың тұрмыс сапасын арттыруға бағытталған жұмыстар алдағы уақытта да жалғасын табады. Тұрғындарды баспанамен қамту – әлеуметтік саясаттың маңызды бағыты болып қала бермек.
