«Қауіп – сақтықта сейіледі», – дейді қазақ. Оған «Жау жоқ деме, жар астында» деген сөзін қосыңыз. Даналықтан тау тұрғызар шамасы бар баба жұрт мұның бәрін ұрпағының қауіпсіз болуы үшін, сақ жүруі үшін айтқан болуы керек. Осы орайда Ескелді ауданының әкімдігі көктемгі қауіпсіздік жұмыстарына білек сыбана кіріскен. Су басу қауіпі жоғары жерлерде қызу тірлік жүріп жатыр.
Өткен бейсенбіде аудан әкімінің орынбасары Бағлан Абылқасымов бастаған арнайы құрам әдеттегідей су желілерін тазарту жұмыстарын жүргізді. Бұл үшін 40-қа жуық адам, 4 техника жұмылдырылды. Дегенмен, аудан әкімінің орынбасары жергілікті тұрғындар ауласынан өтетін арық желілеріне қоқыс тастау арқылы қауіпті еселейтінін алға тартып отыр.
– Қазір жұмылған жұдырықтай қауіпті сейілту шараларын жүзеге асырып жатырмыз. Бүгін біршама жұмыстар атқарылды. Алайда, аудан тұрғындары да бей-жай болмаса. Қыс бойы арық желілерін қоқысқа толтырады кей тұрғын. Қазір қауіп жоқ. Қардың дені еріп, арық желілері тазартылды. Сонда да қауіпсіздік шараларын күшейтеміз, – дейді аудан әкімінің орынбасары.
Айта кететін жайт, ақпан айы басталғалы жергілікті әкімдік 365 шақырым арық желісін тазартуға көшкен. Елді мекендерде қар үйінділерінің болмауын да жіті назарда ұстап отыр. Себебі қауіпті учаскелері бар ауылдарда мұндай үйінділер көктемгі жылымықта қардың тез еруі салдарынан селге айналуы мүмкін. Сонымен қатар, жергілікті әкімдік аудандық тәртіп сақшыларымен бірлесіп арық желілерін қоқыспен көмген жағдайларды анықтап, тиісінше шаралар қабылдауға кіріскен. Сақтық шараларын ұлғайтқан аудандық атқарушы билік төтенше жағдайлар орын ала қалған жағдайда оның салдарын жоюға дайын 98 адамнан тұратын құрам жасақтаған. Осы құрам 34 бірлік техника, 18 сусорғы, 1450 тонна инертті материал жасақтаған. Бұл техникалардың үздіксіз жұмыс істеуі үшін 2000 литр жанар-жағармай алуға бюджеттен қаражат қарастырылған.
Дастанбек САДЫҚ
