Ішкі істер министрлігі интернет арқылы қазақстандықтарды шетелдегі «жалақысы жоғары жұмысқа» тарту жағдайлары көбейгенін мәлімдеп, мұндай ұсыныстардың қауіпті болуы мүмкін екенін ескертті.
Бұл туралы 7-su.kz ақпараттық порталы Azattyq Rýhy сайтына сілтеме жасап хабарлайды.
Ведомствоның мәліметінше, алаяқтар әлеуметтік желілерде, мессенджерлер мен түрлі хабарландыру сайттарында табысы жоғары жұмыс ұсынып, азаматтарды шетелге шақырады. Хабарландыруларда жол ақысы мен жатын орны тегін екені, жұмысқа тәжірибе мен тіл білудің қажет еместігі айтылып, оңай табыс табуға уәде беріледі. Мұндай ұсыныстар көбіне Telegram-арналарда, WhatsApp топтарында және өзге де онлайн алаңдарда таралады.
Алайда шетелге барған азаматтар іс жүзінде мүлде басқа жағдайға тап болуы мүмкін. Атап айтқанда:
-
жеке куәлік пен өзге де құжаттарының тартып алынуы;
-
еркін жүріп-тұру мүмкіндігінің шектелуі;
-
интернет арқылы жасалатын алаяқтық схемаларға күштеп тартылу;
-
уәде етілген жалақының берілмеуі;
-
«босатып жіберу» немесе елге қайтару үшін ақша талап ету;
-
қысым көрсету мен қорқыту.
Ішкі істер министрлігі мұндай жағдайларға тап болмас үшін бірнеше сақтық шарасын ұстануға кеңес береді. Атап айтқанда:
-
шетелге жұмысқа тек ресми тіркелген, лицензиясы бар агенттіктер арқылы бару;
-
жұмыс беруші туралы мәліметті және келісімшарт талаптарын мұқият тексеру;
-
құжаттар мен жеке деректерді бейтаныс адамдарға бермеу;
-
сапар бағыты мен баратын жері туралы жақындарға алдын ала хабарлау.
Егер күмәнді ұсыныс алсаңыз немесе алаяқтық белгілерін байқасаңыз, бірден құқық қорғау органдарына жүгінген жөн. Ведомство өкілдері азаматтарды қырағы болуға және интернеттегі күмәнді ұсыныстарға сенбеуге шақырды.
