Таяу Шығыстағы жағдайдың ушығуына байланысты әлемдік державалар өз ұстанымдарын білдіріп жатыр. Қытай Халық Республикасының Сыртқы істер министрі Ван И аймақтағы әскери қақтығыстарды дереу тоқтату қажеттігін мәлімдеді. Ресми Бейжің жағдай бақылаудан шығып, қақтығыс басқа елдерге таралып кетпеуі үшін шұғыл шаралар қабылдауға шақырды, – деп хабарлайды 7-su.kz ақпараттық порталы «Синьхуа» агенттігіне сілтеме жасап.
Ван И Бейжіңде өткен брифинг барысында аталған мәселенің әскери жолмен шешімі жоқ екенін қадап айтты. Министрдің пайымдауынша, қарулы қақтығыстар тек жаңа өшпенділікті туындатып, онсыз да күрделі ахуалды қиындата түседі. Қытай дипломаты мемлекеттердің ұлылығы күш қолданумен өлшенбейтінін, ал жазықсыз бейбіт тұрғындар соғыс құрбаны болмауы тиіс екенін ескертті. Ол Парсы шығанағы аймағындағы мемлекеттердің, соның ішінде Иранның егемендігі, қауіпсіздігі және аумақтық тұтастығы құрметтелуі тиіс екенін атап өтті. Министрдің пікірінше, аталған қағидалар аймақтағы жағдайды реттеудің негізгі принциптері болуы қажет.
«Күштінің бәрі дұрыс деген сөз емес. Әлем «джунгли заңы» кезеңіне қайта оралмауы керек», – деді Ван И.
Сондай-ақ ол аймақ елдерінің ішкі істеріне араласпау қажеттігін айтты. Министрдің сөзінше, Таяу Шығыстың тағдырын сол аймақтың халықтары мен мемлекеттері өздері шешуі тиіс.
«Революциялар ұйымдастыру немесе билікті күшпен өзгерту әрекеттері қолдау таппайды. Барлық тарап мүмкіндігінше тезірек келіссөздер үстеліне қайта оралып, келіспеушіліктерді тең құқықты диалог арқылы шешуі керек», – деді Қытай СІМ басшысы.
Ван И ірі державаларды әділдік қағидатын ұстанып, Таяу Шығыстағы бейбітшілік пен тұрақтылықты қамтамасыз етуге оң рөл атқаруға шақырды. Ол Қытай аймақ елдерімен бірге жаһандық қауіпсіздік бастамасын жүзеге асыруға дайын екенін мәлімдеді.
