Үкімет жаңа Салық кодексін енгізу жөніндегі жобалық кеңсенің алдын ала жұмыс қорытындысын қарап, кәсіпкерлер мен азаматтар үшін маңызды жеңілдіктерді талқыға салды, – деп хабарлайды 7-su.kz ақпараттық порталы Tengrinews.kz сайтына сілтеме жасап.
Қазіргі уақытта арнайы топ Салық кодексі нормаларын іске асыруға қатысты 60-тан астам өзекті мәселені қарастырып үлгерді. Өзгерістер тек бизнеске ғана емес, әлеуметтік салаға да тікелей әсер етеді.
Денсаулық сақтау және дәрі-дәрмек бағасы
Денсаулық сақтау саласында дәрілік заттар мен медициналық бұйымдарды импорттау кезінде қосылған құн салығын (ҚҚС) қолдануға қатысты ережелер қайта қаралып жатыр. Атап айтқанда, сирек кездесетін (орфандық) және әлеуметтік маңызы бар дәрі-дәрмектерді ҚҚС-тан босату көзделген. Денсаулық сақтау министрлігі дәрі-дәрмектердің шекті бағасын ҚҚС-сыз белгілеу туралы бұйрықты бекітті. Енді маңызды препараттар қолжетімді болады.
Мүгедектігі бар жандар үшін салықтық жеңілдіктер
Қолданыстағы заңнама бойынша жеке табыс салығынан шегерім мөлшері мүгедектік тобына байланысты 882-ден 5000 айлық есептік көрсеткішке (АЕК) дейін ауытқиды. Егер адамның мүгедектік тобы жыл ішінде өзгерсе, қай мөлшерлемені қолдану керектігі туралы түсініксіздік туындайтын. Енді мұндай жағдайда «сіңіру» принципі бойынша максималды 5000 АЕК мөлшеріндегі шегерімді бекіту ұсынылып отыр. Бұл азаматтардың құқығын қорғауға бағытталған игі бастама.
Несиелер мен экспорттағы жеңілдіктер
Қаржы секторында несиелер мен микрокредиттер бойынша сыйақы операцияларын электронды шот-фактура (ЭШФ) жазып беру талабынан босату ұсынылды. Норма 2026 жылдың 1 қаңтарынан бастап кері күшімен қолданысқа енуі мүмкін. Сонымен қатар:
-
Энергетикалық сусындар: Экспортқа шығарылатын өнімдерді акцизден босату тетігі қарастырылуда.
-
Авиациялық отын: Әуе тасымалына арналған жанар-жағармай импортын ҚҚС-тан босату тәртібі нақтыланады.
-
Жер қойнауын пайдалану: Пайдалы қазбаларды өндіру салығын пайдаланушы тіркелген жер бойынша емес, қазба жұмыстары жүріп жатқан аймақтың бюджетіне аудару мәселесі шешілмек.
Цифрлық ашықтық және салық құпиясы
Салықтық әкімшілендіруді жеңілдету үшін салық құпиясына жатпайтын мәліметтер тізімі кеңейеді. Оған әлеуметтік төлемдер сомасы, олар бойынша берешектер мен салық төлеушілердің кейбір тіркеу деректері кіреді. Бұл цифрлық бақылауды күшейтіп, әлеуметтік міндеттемелердің орындалуын ашық етеді.
Еске сала кетейік, Мемлекет басшысы Қасым-Жомарт Тоқаев Ұлттық құрылтай отырысында Салық кодексі «қатып қалған қағида» емес екенін, оған бизнес пен халықтың мүддесі үшін өзгерістер енгізу қажеттігін атап өткен болатын. Үкімет басшысы Олжас Бектенов бұл бағыттағы жұмыстарды ширатуды тапсырды.
