Жетісу облысында құтқару жұмыстары кезінде қызметтік борышын атқару барысында Төтенше жағдайлар департаментінің қызметкері қаза тапты, – деп хабарлайды 7-su.kz ақпараттық порталы.
Өңірлік ТЖД мәліметінше, 7 наурыз күні Панфилов ауданы Атамекен ауылдық округіндегі Алтынкөл көлінде балық аулау кезінде мұз жарылып, бір адамның көл ортасына қарай ағып кеткені туралы хабарлама түскен.
Оқиға орнына Жетісу облысы ТЖД күштері мен құралдары, Жаркент қаласындағы №11 өрт сөндіру бөлімінің қызметкерлері, Талдықорған қаласының жедел құтқару жасағы, сондай-ақ ҚР ТЖМ-нің «Барыс» республикалық жедел-құтқару жасағы мен Алматы облысы ТЖД құтқарушылары жіберілген.
«Құтқару жұмыстарын жүргізу барысында мұз қайта жарылып, салдарынан Панфилов ауданы төтенше жағдайлар бөлімінің №11 өрт сөндіру бөлімінің қарауыл бастығы, азаматтық қорғау майоры Таранов Дамир Таиржанович қаза тапты», – делінген хабарламада.
Марқұмның артында жұбайы мен екі баласы қалды.
