Дауыс беру рәсімінен кейін ол журналистердің сұрақтарына жауап берді. Тілшілер Сенат төрағасынан Қазақстанда вице-президент лауазымын енгізу мәселесіне қатысты және өзінің бұл қызметке лайықты-лияқсыз екені жөнінде пікірін сұрады, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
Мәулен Әшімбаев бұл сұраққа референдум аяқталғаннан кейін ғана нақты жауап беруге болатынын айтты.
– Кез келген мәселеге жауапты түрде жауап беруіміз керек. Себебі заң аясындағы талаптар бар. Ол талаптарды бұзуға ешқандай құқығымыз жоқ. Сондықтан Конституцияны халқымыз қолдап жатса, шешім қабылданып жатса, тиісті шешім Конституцияға қатысты қабылданатын болады. Егер халық Конституцияны қолдаса, ол 1 шілдеден бастап күшіне енеді. Бұл мәселелерге референдумнан кейін жауап беремін. Қазір мен айтқан нәрсе қолданыстағы заңнамаға қайшы болуы мүмкін. Сондықтан біз мұндай сұрақтарға референдумнан кейін жауап береміз, – деді Сенат төрағасы.
Айта кетейік, бұған дейін Қазақстанда вице-президент лауазымын енгізу мүмкіндігі қарастырылып жатқаны хабарланған болатын. Сондай-ақ болашақта бір палаталы парламент «Құрылтай» деп аталып, оның құрамында 145 депутат болуы мүмкін екені айтылды. Депутаттардың өкілеттік мерзімі 5 жыл болады деп жоспарланған.
Сонымен қатар Президент жаңа жоғары консультативтік орган – Қазақстанның Халық кеңесін құруды ұсынған.
