Жыл басынан бері Жетісу облысында 68 өрт оқиғасы тіркелді. Жарақат алғандар саны өткен жылмен салыстырғанда 5 адамға артты. Газбен уланған 3 адам қаза тапты. Өрттің және тасқынның алдын-алу бойынша облыста бірқатар жұмыс жүргізіліп жатыр. Бұл жөнінде Бейсен Құранбек атындағы журналситер үйіне арнайы келіп, журналситермен жүздескен Жетісу облысы ТЖД Мемлекеттік өрт бақылау басқармасының аға инженері Жан Орысбай мен Талдықорған қаласы Төтенше жағдайлар басқармасы азаматтық қорғаныс тобының аға офицері Бауыржан Манасов айтты.
Талдықорған қаласында 2026 жылғы су тасқыны қаупінің алдын алу мақсатында кешенді іс-шаралар қарқынды жүргізіліп жатыр. Қала әкімдігі бекіткен жоспар аясында Қаратал және Балықты өзендерінің қауіпті учаскелерін тазарту, жағалауды бекіту және арық желілерін ретке келтіру жұмыстары қолға алынды. Биыл Қаратал өзенінің 6 маңызды учаскесінде 13,2 мың текше метр инертті материал қоры жасақталып, Нұрсұлтан Назарбаев даңғылы мен Ілияс Жансүгіров көшесі аралығындағы 802 метр арнаны тазарту жоспарланған. Ал Балықты өзені бойында габиондар орнату және арнаны кеңейту шаралары жүріп жатыр. Төтенше жағдай орын алған жағдайда халықты эвакуациялау үшін 7 арнайы пункт белгіленіп, жергілікті кәсіпорындармен техника, азық-түлік және жанар-жағармай бөлу туралы келісім жасалған. Сонымен қатар, Талдықорғанмен іргелес Еңбек, Өтенай, Еркін ауылдарындағы арық жүйелерін тазалауға коммуналдық қызметтер жұмылдырылған.
Өңірдегі қауіпсіздік мәселесі тек су тасқынымен шектелмейді. Жыл басынан бері өрт оқиғаларының саны 5,6 пайызға азайғанымен, жарақат алғандар мен қаза болғандар саны алаңдатарлық деңгейде. Мәселен, биылғы жылыту маусымы басталғалы 97 өрт оқиғасы тіркеліп, соның салдарынан 8 адам қаза тапса, тағы 10 тұрғын түрлі жарақат алған. Мамандардың айтуынша, өрттің 42,5 пайызы электр сымдарындағы қысқа тұйықталудан, ал 37,6 пайызы пеш жабдықтарын дұрыс пайдаланбаудан туындап отыр. Әсіресе, пайдалану мерзімі 30-50 жылдан асқан ескі үйлерде қауіп жоғары. Қауіпсіздікті қамтамасыз ету үшін әлеуметтік осал топтағы отбасылардың үйлеріне 2463 газ датчигі орнатылып, 97 мыңнан астам адамға түсіндіру жұмыстары жүргізілді. Төтенше жағдайлар қызметі жылыту маусымы аяқталғанға дейін бақылау жұмыстарын жалғастыра бермек.
«ЖЕТІСУ-АҚПАРАТ»
