«Әділетті және Прогрессивті Қазақстанның Халықтық Конституциясы үшін!» өңірлік коалициясының қорытынды отырысы өтті. Айта кету керек, аталған коалицияның ашылу салтанаты да дәл осы ғимаратта өткен болатын. Осылайша, маңызды саяси науқанның басталуы мен қорытындысы бір алаңда түйінделді.
Іс-шараға саяси партиялардың өкілдері, ардагерлер, барлық деңгейдегі мәслихат депутаттары, қоғамдық кеңес мүшелері, үкіметтік емес ұйымдар, «Атамекен» кәсіпкерлер палатасы, Азаматтық альянс өкілдері, сондай-ақ өңірдің белсенді азаматтары қатысты.
Алқалы жиында атқарылған жұмыстар сараланды.
Жиын барысында өңірлік коалиция төрағасы, «AMANAT» партиясы Жетісу облыстық филиалының төрағасы Арыстанғали Арын сөз сөйлеп, атқарылған жұмыстарға жан-жақты тоқталды.
«Біз үлкен тарихи кезеңді абыроймен еңсердік. Бүгін Жетісу облыстық коалициясының жұмысын қорытындылап, ел үшін маңызды саяси кезеңде жүзеге асқан ауқымды істерді саралап отырмыз. Бұл – тек бір науқанның аяқталуы емес, бұл – еліміздің жаңа даму кезеңіне жасалған нық қадам», – деп атап өтті ол.
Науқанды тиімді ұйымдастыру мақсатында 1 облыстық, 2 қалалық және 8 аудандық коалиция құрылып, олардың құрамына жалпы саны 327 мүше тартылды. Бұдан бөлек, 50 мобильді капитан мен 607 байқаушы дайындалып, дауыс беру процесінің ашықтығы мен әділдігін қамтамасыз етуге белсенді үлес қосты.
Коалиция жұмысы аясында өңірде кең ауқымды ақпараттық-түсіндіру шаралары жүргізіліп, 917 іс-шара өткізіліп, 109 мыңнан астам азамат қамтылды.
Конституция күні енді жыл сайын 15 наурызда ұлттық деңгейде атап өтіледі. Бұл күн – тек мереке ғана емес, ол – мемлекетіміздің құндылықтарын ұлықтайтын, заң үстемдігін дәріптейтін, ел бірлігін нығайтатын маңызды күнге айналуы тиіс.
