Мемлекет басшысы Қасым-Жомарт Тоқаев ғылым саласын қаржыландыру жүйесіне қатаң ревизия жасап, қаражаттың жұмсалуында ашықтықты қамтамасыз етуді тапсырды, – деп хабарлайды 7-su.kz ақпараттық порталы.
Соңғы 6 жыл ішінде елімізде ғылымды дамытуға бөлінетін бюджет көлемі айтарлықтай өсті. Қазіргі уақытта бұл мақсатқа жыл сайын 200 млрд теңгеден астам, яғни 500 млн доллардан асатын қаражат бағытталып отыр. Алайда, Президенттің пайымдауынша, мұндай қомақты инвестицияның нақты қайтарымы мен экономикаға тигізер пайдасы әзірге байқалмайды.
Бас прокуратура жүргізген тексеріс жұмыстары Ғылым және жоғары білім министрлігі мен Ғылым қорында көптеген қаржылық заңбұзушылықтардың орын алғанын анықтаған. Қасым-Жомарт Тоқаев грант алушыларды аккредиттеуден бастап, жобаларды қаржыландырудың соңғы кезеңіне дейінгі аралықта жүйелі кемшіліктер бар екенін қадап айтты.
«Ғылым мен жемқорлық бір-біріне кереғар құбылыс, екеуі қатар аталмауға тиіс. Мемлекет қаржысын жымқырғысы келетін кез келген әрекетке тосқауыл қоятын сүзгі не кедергі жоқ», – деді Мемлекет басшысы.
Президенттің айтуынша, қазіргі таңда ғылыми ортада «қаражатты қалайда игерсек болды» деген тиімсіз ұстаным қалыптасқан. Ғылыми жұмыстардың жаңашылдығы мен практикалық маңызына тиісті деңгейде көңіл бөлінбейді. Сонымен қатар сараптама кезеңінің тым ұзаққа созылуы инновациялық жобалардың дер кезінде жүзеге асуына кедергі келтіріп отыр.
Бұл мәселені шешу үшін Үкіметке шұғыл шаралар қабылдау жүктелді. Алдағы уақытта ғылымды қаржыландыру тек қағаз жүзіндегі есеп үшін емес, ел экономикасына нақты пайда әкелетін басым бағыттар бойынша жүргізілуі тиіс. Бұл қадамдар ғалымдардың жауапкершілігін арттырып, сапалы зерттеулердің көбеюіне жол ашады.
