Қазақстанда қоғамдық тәртіпті қамтамасыз ету және көші-қон заңнамасын реттеу мақсатында өткізілген «Мигрант» жедел-профилактикалық іс-шарасы аяқталды. Ресбуликалық деңгейдегі тексеріс нәтижесінде шетел азаматтары тарапынан жасалған 7 мыңнан астам құқық бұзушылық әшкереленді, – деп хабарлайды 7-su.kz ақпараттық порталы.
Ішкі істер министрлігінің мәліметінше, 4,1 мың шетелдік елде болу қағидаларын сақтамағаны үшін әкімшілік жауапкершілікке тартылса, тағы 2,7 мың адам заңсыз еңбек қызметімен айналысқан. Тексеріс барысында тек сырттан келгендер емес, оларды қабылдаған отандастарымыздың да жауапсыздығы анықталды. Мәселен, 2,2 мың қазақстандық пен заңды тұлға шетелдік қонақтар туралы полицияға уақытылы хабар бермеген. Сондай-ақ 500-ден астам жұмыс беруші шетелдік жұмыс күшін заңсыз пайдаланғаны үшін жазаланды. Салынған айыппұлдардың жалпы сомасы 200 млн теңгеден асып жығылды.
Заң талаптарын өрескел бұзған 1,5 мың шетел азаматының елде болу мерзімі қысқартылды. Сонымен қатар сот шешімімен 1,2 мың адамды елден шығару туралы қаулы қабылданды. Қазіргі таңда 121 шетелдік мәжбүрлі түрде депортацияланды, олардың арасында 8 адам деструктивті-радикалды ағым өкілі екені анықталған. Елден қуылғандардың барлығына алдағы 5-жыл бойы Қазақстанға кіруге тыйым салынды.
Жедел іс-шара аясында 24 қылмыстық іс қозғалды. Оның ішінде мемлекеттік шекараны заңсыз кесіп өту және заңсыз көші-қонды ұйымдастыру бойынша 9 деректен тіркелсе, шетелдік жұмыс күшін тарту ережесін бұзуға қатысты 6 іс бар. Мамандардың талдауына сүйенсек, шетелдіктердің заң бұзуына көбіне жылдам пайда тапқысы келетін жергілікті азаматтардың өздері жағдай жасайды.
Шымкент қаласы мен Алматы, Жамбыл, Шығыс Қазақстан облыстарында заңсыз жұмыс күшін пайдалану деректері жиі тіркелген. Алматы қаласы мен Маңғыстау, Түркістан өңірлерінде көрші мемлекеттерде қылмыс жасап, іздеуде жүрген 22 шетелдік қолға түсті. Тіпті, өңірлердің бірінде Қазақстан азаматының жалған құжаттар арқылы шетелдіктерді заңдастырмақ болған әрекеті әшкереленіп, сотқа дейінгі тергеу басталды.
Құқық қорғау органдары заңсыз көші-қонмен күрес жұмыстары жалғаса беретінін ескертеді. Заңсыз жұмыс күшін тартатын компаниялар үшін бұл тек айыппұл ғана емес, сонымен бірге инвесторлар мен серіктестер алдындағы беделге де нұқсан келтіретін үлкен тәуекел.
