Облыстық көпсалалы клиникада онкологиялық аурулардың алдын алу және ерте анықтауға арналған Ашық есік күні өтті. Іс-шара Қазақстан Республикасы Денсаулық сақтау министрлігінің қолдауымен ұйымдастырылды.
Бұл күні өңірдің 50-ге жуық тұрғыны жолдама мен алдын ала жазылусыз-ақ онколог-дәрігерлердің тегін кеңесін алу мүмкіндігіне ие болды. Шараның негізгі мақсаты – мамандандырылған медициналық көмектің қолжетімділігін арттыру, халықты алдын алу шаралары туралы ақпараттандыру және онкологиялық ауруларды ерте анықтау.
Мамандар жатыр мойны обыры, колоректалдық қатерлі ісік және бүйрек обыры секілді дерттердің диагностикасына ерекше назар аударды.
Клиника мамандарының айтуынша, мұндай акциялар халық денсаулығын сақтауда маңызды рөл атқарады.
– Онкологиялық аурулармен күресте ерте диагностика шешуші фактор болып қала береді. Дерт бастапқы кезеңде анықталса, емнің нәтижелі болуы айтарлықтай артады. Осындай Ашық есік күндері тұрғындардың дер кезінде дәрігерге қаралуына және білікті көмек алуына мүмкіндік береді, – деді облыстық көпсалалы клиника директорының орынбасары Дәуренбек Әріпжанов.
Облыс тұрғындары бұл мүмкіндікті тиімді пайдаланып, көкейдегі сұрақтарын қойып, аурудың алдын алу жолдары туралы мәлімет алды.
– Алдын ала жазылмай-ақ келіп, кеңес алуға мүмкіндік жасағаны тұрғындар үшін өте маңызды. Көпшілік кезек күтіп жүргісі келмей, дәрігерге қаралуды кейінге қалдыра береді. Ал мұндай шаралар денсаулыққа дер кезінде көңіл бөлу керектігін еске салады, – деді қала тұрғыны Айман Дүйсебаева.
Ашық есік күні аясында мамандар онкологиялық аурулардың алғашқы белгілері, қауіп факторлары және тұрақты профилактикалық тексерулерден өтудің маңызы туралы да жан-жақты ақпарат берді. Ұйымдастырушылар атап өткендей, мұндай шаралар тұрғындардың өз денсаулығына жауапкершілікпен қарау мәдениетін қалыптастыруға ықпал етіп, ауруларды ерте кезеңде анықтауға мүмкіндік береді. Бұл өз кезегінде емнің тиімділігін арттырып, пациенттердің өмір сүру сапасын сақтауға жол ашады.
Гүлжан ТҰРСЫН
