Көксу ауданында суару желілерін қайта қалпына келтіру және жаңғырту жұмыстары жүйелі жүзеге асырылуда. Жұмыс барысын аудан әкімі Дәулет Халелов тексеріп қайтты.
Бүгінде суару желілерін жаңғырту жобасы Ислам даму банкі арқылы қаржыландырылуда. Жоба аясында жалпы ұзындығы 108 шақырым болатын каналдарды қайта қалпына келтіру жұмыстары жүргізіліп жатыр. Оның ішінде 11342 шақырым Г-блоктар мен 40782 шақырым темірбетон науаларды ауыстыру, 460 дана гидротехникалық құрылым салу көзделген. Құрылыс жұмыстарын «Казстройподряд» ЖШС жүргізуде.
Жобаның бірінші кезеңі бойынша Жарлыөзек ауылдық округіне қарасты «Р-1», «Р-3» және Лабасы ауылдық округіндегі «Көк тоған» арнасында жөндеу жұмыстары жүргізілуде. Қазіргі таңда бұл нысандарда 16 техника мен 62 жұмысшы еңбек етуде. Ал екінші кезең аясында ұзындығы 157,7 шақырым болатын 27 канал қайта жаңғыртылатын болады. Құрылыс жұмыстарын «Универсал строй сервис» ЖШС жүзеге асыруда. Бүгінде Лабасы ауылдық округіндегі Мәмбет, Балпық ауылдық округіндегі Ақшатоған, Нұрабай, Жарлы-өзек ауылдық округіндегі «Р-3» және Мұқаншы ауылдық округіндегі Бақытжан каналдарында құрылыс жұмыстары жүргізілуде. Аталған нысандарда 16 техника мен 73 адам жұмыс істеуде.
Аружан ЖАҚЫП
Көксу ауданы әкімінің баспасөз хатшысы
