Мәжіліс депутаты Дәулет Тұрлыхановтың ұлы Нұрасыл Болаттың жаза мерзімін өтеп шыққаны белгілі болды, – деп хабарлайды 7-su.kz ақпараттық порталы.
Бұл туралы Қылмыстық-атқару жүйесі комитеті (ҚАЖК) мәлімдеді.
– Сауалда көрсетілген сотталушы сот тағайындаған жаза мерзімін толық өтеуіне байланысты босатылды, – делінген ведомствоның ресми жауабында.
Айта кетейік, бұған дейін Алматыда әскери қызметкердің адвокатты соққыға жыққаны туралы ақпарат тараған болатын. Оқиға 11 ақпанға қараған түні қаладағы сауда орталықтарының бірінің маңындағы автотұрақта болған.
Іс қоғамда резонанс тудырды. Оқиға туралы адвокат Олег Черновтың жұбайы Анна Дмитриевич әлеуметтік желідегі парақшасында жазған. Оның айтуынша, олар таксиге отыра берген сәтте белгісіз жігіт келіп, соққыға жығылған қызға көмектесуді сұраған.
Кейін адвокатқа шабуыл жасаған адамның Мәжіліс депутаты Дәулет Тұрлыхановтың ұлы Нұрасыл Болат екені анықталды. Бұл ақпаратты депутаттың өзі де растаған.
2023 жылғы 9 қазанда сот Нұрасыл Болатты кінәлі деп танып, 1 700 000 теңге көлемінде айыппұл салған.
2024 жылғы 14 мамырда Жоғарғы Сот істі кассациялық тәртіппен қарап, үкімді өзгертті. Сот шешімімен оған екі жыл бас бостандығын шектеу жазасы тағайындалып, өтемақы мөлшері ұлғайтылды.
