Көшедегі жарнама мәтіндері, маңдайшалар мен қоғамдық тамақтану орындарындағы мәзірлердің сауаттылығы бүгінде қоғам назарындағы мәселе. Бұл салада тәртіпті қалай жолға қоюға болады? Ол үшін бизнеске зиян келтірмеудің тиімді жолы қандай? Осы сауалдарға жауап іздеу мақсатында Талдықорғанда арнайы семинар-тренинг өтті.
Іс-шара тілдік нормаларды сақтау мәселесіне арналды. Кездесуді облыстық қоғамдық даму басқармасы ұйымдастырды.
Басқарма басшысының орынбасары Ермек Ақшабаев атап өткендей, жиынның басты мақсаты – мемлекеттік тілдің қолданылу аясын кеңейту және сыртқы жарнаманың сауаттылығын жүйелі түрде бақылау. Сонымен қатар, бұл бағыттағы жұмыстар тек заң аясында жүргізілмек.
– Қазіргі таңда біздің басқармаға тексеру жүргізу өкілеттігі берілген. Алайда біз асығыс шешім қабылдап, қатаң шараларға жүгінуді көздеп отырған жоқпыз. Ең алдымен, түсіндіру жұмыстарын кеңінен жүргізу маңызды. Барлық әрекет заң талаптарына сай жүзеге асырылады, – деді спикер.
Семинарға арнайы шақырылған Ахмет Байтұрсын- ұлы атындағы Тіл білімі институтының директоры Анар Фазылжан қатысушыларға сараптамалық қолдау көрсетті. Ол өз сөзінде мәтіндердің сауатты құрылуы, тілдік нормаларды сақтау және қателерді ажырату жолдарын нақты мысалдар арқылы түсіндірді. Ермек Ақшабаевтың айтуынша, кез келген азамат дүкендердегі маңдайшалар мен жарнамадағы тілдік қателерді байқаса, «E-Өтініш» порталы арқылы ресми түрде өтініш жолдай алады. Мұндай өтініштерді қарау тәртібі нақты белгіленген. Шағым түскеннен кейін тиісті орган тексеру жүргізіп, кәсіпкерді түсіндіру жұмысына шақырады. Алғашқы құқықбұзушылық кезінде ескерту түрінде әкімшілік хаттама толтырылады. Егер бір жыл ішінде заң бұзушылық қайталанса кәсіпкерге айыппұл салынады.
Облыста осындай келеңсіз жағдайлардың алдын алу мақсатында «Тіл тазалығын сақтайық» атты акция бастау алады. Шара аясында көшелерге ағартушылық баннерлер ілініп, тұрғындар мен кәсіпкерлерге арналған арнайы әдістемелік нұсқаулықтар таратылмақшы.
Амина ТҰРСЫНБЕКОВА,
ЖУ студенті
