Жетісу облысында 11 қыркүйек – Отбасы күніне орай «Әділет» партиясы Жетісу облыстық филиалы мен Әйелдер қанаты бірлесіп, әлеуметтік қолдауды қажет ететін отбасыларға арнайы барып, мерекелік көңіл-күй сыйлады.
Игі шараға «Әділет» партиясы Жетісу облыстық филиалының төрағасы Амангелді Есбай, Жетісу облысы бойынша Әйелдер қанатының төрайымы Гүлниса Досанқызы мен өзге де мүшелері қатысты.
Кездесу барысында отбасының қоғамдағы маңызы, бала тәрбиесі мен отбасылық құндылықтарды сақтау мәселелері сөз болды. Партия өкілдері әр шаңыраққа береке-бірлік, амандық пен молшылық тіледі.
«Отбасы – қоғамның берік негізі. Әрбір отбасының қуанышы мен қиыншылығына бейжай қарамай, қолдау көрсету – баршамызға ортақ міндет. Осындай игі бастамалар арқылы отбасылық құндылықтарды дәріптеп, қоғамдағы өзара қамқорлық пен жанашырлықты арттыра түсеміз», – деді «Әділет» партиясы Жетісу облыстық филиалының төрағасы Амангелді Есбай.
Айта кету керек, игі бастама аясында өңір бойынша 40 отбасы қамтылды. Олардың қатарында тұрмыстық жағдайы төмен және әлеуметтік қолдауды қажет ететін отбасылар, аз қамтылған көпбалалы отбасылар, сондай-ақ мүмкіндігі шектеулі балаларды тәрбиелеп отырған жанұялар бар.
«Әділет» партиясы алдағы уақытта да әлеуметтік осал санаттағы азаматтарға қолдау көрсетіп, отбасылық құндылықтарды дәріптеуге бағытталған қайырымды бастамаларды жалғастыра бермек.
