Қазіргі жаһандану дәуірінде әр халық үшін ең үлкен сын – өз болмысын жоғалтпай, заман ағымымен қатар өмір сүре білу. Осы тұрғыда ұлттық құндылықтарды дәріптеу – тек мәдени мұраны сақтау ғана емес, ұлттың рухани тұтастығын нығайтып, болашақ ұрпақтың санасына бағыт-бағдар беру екені анық.
Ұлттық құндылық ғасырлар сүзгісінен өткен өмірлік тәжірибенің жиынтығы. Оның құрамына ана тілі, дін, салт-дәстүр, әдет-ғұрып, ұлттық ойындар мен өнер, мәдениет кіреді. Бұл халықтың тарихи жадын, дүниетанымын, мінез-құлқын айқындайтын басты негіз. Мәселен, үлкенді құрметтеу, кішіге ізет көрсету, қонақжайлылық пен еңбекқорлық секілді қасиеттер қазақ қоғамының алтын діңгегіне айналған. Осындай асыл құндылықтар арқылы қоғамда өзара сыйластық пен бірлік бекиді.
Бүгінде ұлттық тәрбиенің бастауы отбасы мен білім беру жүйесіне тікелей байланысты. Баланың бойына ұлттық рухты сіңіру ең алдымен шаңырақтан басталып, балабақша мен мектеп қабырғасында жүйелі түрде жалғасуы тиіс. Әсіресе, мектепке дейінгі кезеңде ұлттық ойындарды ойнату, салт-дәстүрлермен таныстыру, халық ертегілерін оқыту арқылы бала санасына төл мәдениеттің негізін қалыптастыруға болады. Мұндай тәрбие баланың тілін дамытып қана қоймай, оның ойлау қабілетін жетілдіріп, ұлттық сананың берік қалыптасуына жол ашады.
Заман талабына сай, ұлттық құндылықтарды насихаттаудың жаңа тетіктері де маңызды рөл атқаруда. Цифрлық кеңістіктің мүмкіндігін тиімді пайдалану арқылы ұлттық мазмұндағы сапалы өнімдер ұсыну – уақыттың талабы. Әлеуметтік желілер, анимациялық жобалар, бейнероликтер арқылы жас ұрпақтың қызығушылығын оятып, олардың ұлттық мәдениетке деген құрметін арттыруға болады. Бұл дәстүр мен технологияның тоғысқан тұсы.
Ұлттық құндылықтарды сақтау – бір ғана саланың емес, тұтас қоғамның міндеті. Себебі өз мәдениетін құрметтеген адам ғана өзге ұлттардың да рухани байлығын бағалай алады. Демек, ұлттық құндылықтарды дәріптеу – ұлт болашағына салынған инвестиция, ұрпақ тәрбиесінің өзегі.
Эльмира МАЖИБАЕВА,
«Қарлығаш» бөбекжай-бақшасының
тәрбиешісі
Алдабергенов ауылы,
Ескелді ауданы
