Әскер – темірдей тәртіпке бағынуы тиіс сала. Алайда сол талаптың босаңсуы кейде орны толмас өкінішке ұрындырады. Маңғыстау облысында болған сарбаз өліміне қатысты іс – соның айқын көрінісі.
Сот шешімімен Қарақия ауданы аумағындағы «Үстірт» шекара заставасының бастығы кінәлі деп танылып, 2 жылға бас бостандығынан айырылды. Сонымен қатар ол марқұмның туыстарына 10 миллион теңге көлемінде моральдық өтемақы төлеуге міндеттелді. Үкім әзірге заңды күшіне енген жоқ, – деп хабарлайды 7-su.kz ақпараттық порталы.
Қайғылы оқиға 2025 жылдың қазан айында шекара бекетінде тіркелген. Тергеу деректеріне сәйкес, застава басшысы дизель агрегатының ақаулы екенін біле тұра, қауіпсіздік талаптарын толық түсіндірмей, екі сарбазға оны тазалау жөнінде тапсырма берген.
Жұмыс барысында сарбаздардың бірі жанармай сақталатын орынға кіріп, цистернаға көтерілген сәтте бензин буына уланып, есінен танып қалған. Ол шамамен 20 минут бойы ес-түссіз жатқан. Қасындағылар алғашқы көмек көрсетуге тырысқанымен, жас жауынгер сол күйі ес жимай, көз жұмған.
Сот отырысында айыпталушы өз кінәсін мойындады. Іс материалдары оның қызметтік міндетіне немқұрайлы қарағанын дәлелдеді. Соның салдарынан адам өміріне қауіп төндірген жағдай туындап, қайғылы оқиғаға ұласқаны анықталған.
Бұл жағдай әскери құрылымдағы жауапкершілік жүгінің қаншалықты ауыр екенін тағы бір мәрте еске салады. Қауіпсіздік қағидалары қағаз жүзінде қалмай, нақты орындалғанда ғана мұндай қасіреттің алдын алуға болады.
Айта кетейік, бұған дейін Гвардейск гарнизонында да сарбаз қазасына байланысты рота командиріне қатысты қылмыстық істің тергеуі аяқталған еді. Аталған іс Е. Рустемұлының өліміне байланысты қозғалған.
Әскери ортадағы әрбір салғырт қадам – адам тағдырына тікелей әсер ететінін бұл оқиға тағы да дәлелдеп отыр.
