Қазақстанның Сыртқы істер министрлігі Түркияда қаза тапқан Қазақстан азаматына қатысты пікір білдірді, – деп хабарлайды 7-su.kz ақпараттық порталы.
Ведомствоның мәліметінше, қайғылы оқиға 31 наурызда Ыстамбұл қаласының Фатих ауданында болған. Министрлік бұл жағдайдан хабардар.
«Қазір Түркия Республикасының құзыретті органдары тергеу жүргізіп жатыр. Қазақстан Республикасының Ыстамбұлдағы Бас консулдығы марқұмның туыстарына көмектесіп жатыр. Мәселе бақылауда», – делінген хабарламада.
Оқиға кеше сағат 16:30 шамасында болған. Мәліметке сәйкес, белгісіз адам жеке логистикалық компанияда курьер болып жұмыс істеген Қазақстан азаматы Ариф Исмаиловқа оқ жаудырған. Ауыр жарақат алған ол ауруханада көз жұмды.
Ыстамбұл полициясы алдымен күдіктілер мінген көлікті анықтап, кейін дрон көмегімен олардың өзін тапқан. Күдіктілер – Грузия азаматтары. Алдын ала мәлімет бойынша, олар шетелге қашпақ болған.
Қылмыстың себебі әзірге белгісіз.
