Талдықорған қаласында тағы бір қуанышты сәттің шымылдығы түрілді. Қаладағы Салтанат сарайының Мәжіліс залында баспанаға зәру 41 отбасыға жаңа пәтердің кілті салтанатты түрде табысталды. Бұл талай жылдан бері тұрғын үй кезегінде тұрған жандар үшін көптен күткен ақжолтай жаңалық, үміттің ақталған күні.
Салтанатты жиынға қала әкімі Ернат Бәзіл қатысып, қоныс иелеріне кілтті өз қолымен ұсынды. Шара барысында шаһар басшысы мемлекет тарапынан жүзеге асырылып жатқан тұрғын үй құрылысы бағдарламаларының маңызын атап өтіп, әлеуметтік осал топтарды баспанамен қамту басты міндеттердің бірі екенін жеткізді.
Жаңа қоныс иелерінің қатарында көпбалалы аналар, мүмкіндігі шектеулі азаматтар бар. Солардың бірі – Самал Жәнібекова. Ол 2018 жылдан бері көпбалалы отбасы ретінде тұрғын үй кезегінде тұрғанын айтады. Бүгінгі қуанышын жасыра алмаған кейіпкеріміздің сөзінен жылдар бойғы сергелдеңнің салмағы сезіледі.
– Бір пәтерден екіншісіне көшіп-қонып, тұрақсыз тірліктің тауқыметін көп тарттық. Бүгін, міне, өзіміздің баспанамызға қол жеткізіп отырмыз. Бұл – біз үшін өлшеусіз қуаныш, – дейді ол.
Ал І топтағы мүгедектігі бар азамат Асуан Садықов үшін бұл күн тағдырдың жаңа белесі іспетті. 2021 жылы жол-көлік оқиғасына ұшырап, денсаулығынан айырылғаннан кейін тұрғын үй кезегіне тұрған ол енді екі бөлмелі пәтердің иесі атанды.
– Екі ұлым бар. Осы уақытқа дейін жалдамалы пәтер жағалап келдік. Бүгін «Шығыс» шағынауданынан кең, жарық екі бөлмелі пәтер бұйырып отыр. Қала және облыс әкімдігіне шынайы алғысымды білдіремін, – дейді ол.
Жаңа пәтерлер заманауи талаптарға сай салынған көпқабатты тұрғын үй кешендерінен берілді. Инженерлік инфрақұрылымы толық жүргізілген, жылу, су, газ, электр жүйелері талапқа сай тартылған. Пәтерлердің ішкі әрлеу жұмыстары аяқталған, тұрғындардың бірден қоныстануына мүмкіндік бар.
Бұл игі бастама өңірде тұрғын үй құрылысының қарқыны артқанын аңғартады. Әлеуметтік маңызы бар баспаналарды пайдалануға беру арқылы қала билігі халықтың тұрмыс сапасын арттыруға нақты қадам жасап отыр. Баспаналы болған әр отбасының қуанышы – ел еңсесінің биіктігін айғақтайтын айқын көрініс.
Санжар СҰЛТАНҒАЗЫ
