Қазақстан Республикасы Ұлттық ұланының 5514 әскери бөлімінде әскери-патриоттық бағыттағы тағылымды іс-шара өтті. Аталған шараға Талдықорған қаласындағы №10 жалпы орта білім беретін мектептің оқушылары қатысып, әскери өмірдің қыр-сырымен танысуға мүмкіндік алды, – деп хабарлайды 7-su.kz ақпараттық порталы.
Іс-шараның негізгі мақсаты – жас ұрпаққа патриоттық тәрбие беру, әскери қызметтің маңыздылығын түсіндіру және Отанға деген сүйіспеншілік пен құрмет сезімін қалыптастыру. Осы бағытта ұйымдастырылған кездесуде оқушылар әскери бөлімнің тыныс-тіршілігімен танысып, әскери қызметшілер тарапынан ұйымдастырылған көрсетілімдер мен түсіндірме жұмыстарына қатысты.
Шараның ерекше мәні – Тәжік-Ауған шекарасындағы әскери қимылдарға қатысқан ардагерлердің қатысуында болды. Олардың қатарында бөлім ардагері, отставкадағы майор Джаманбаев Ержан Советович те бар. Ардагер өз сөзінде әскери қызметтің жауапкершілігі мен маңыздылығына тоқталып, қиын-қыстау кезеңдерде Отан алдындағы борышты адал атқарудың қаншалықты маңызды екенін атап өтті. Ол өзінің өмірлік тәжірибесімен бөлісіп, жастарды елін, жерін сүюге, батыл әрі қайсар болуға шақырды.
Сонымен қатар, іс-шара барысында әскери бөлім аумағындағы ескерткішке гүл шоқтары қойылып, Отан жолында қаза тапқан батырларды еске алу мақсатында бір минут үнсіздік жарияланды. Бұл тағзым рәсімі қатысушыларға ерекше әсер қалдырып, ел қорғаған ерлерге деген құрметті арттыра түсті.
Тәжік-Ауған ардагерлерінің өнегелі әңгімелері оқушыларға ерекше әсер қалдырды. Жастар олардың ерлігі мен табандылығын үлгі тұтып, әскери қызметке деген қызығушылықтарын арттырды.
Мұндай әскери-патриоттық іс-шаралар жас буынның бойында отансүйгіштік қасиеттерді қалыптастырып қана қоймай, олардың болашақта ел қорғау жолын таңдауға деген ынтасын арттырады.
Іс-шара соңында оқушылар өз әсерлерімен бөлісіп, әскери қызметшілер мен ардагерлерге алғыстарын білдірді. Осындай кездесулер жастардың санасында өшпес із қалдырып, ел болашағына деген сенімін нығайта түсетіні сөзсіз.
