Жетісу өңірінде «Таза Қазақстан» бағдарламасы аясында аумақтарды тазарту, көгалдандыру және елді мекендерді санитарлық тазалау бағытында кешенді жұмыстар қарқынды жүргізілуде. Аталған бастама шеңберінде Ақсу ауданының орталығы І. Жансүгіров ауылында «Таза Қазақстан – ауылымызды көгалдандыруға ат салысайық!» ұранымен ауқымды экологиялық іс-шара ұйымдастырылды.
Бұл туралы 7-su.kz ақпараттық порталы хабарлайды.
Экологиялық мәдениетті қалыптастыруды және қоршаған ортаға жауапкершілікпен қарауды мақсат еткен шараға жергілікті тұрғындар белсене қатысты. Ауыл аумағын абаттандыруға бағытталған жиын барысында туған жердің патриоттары, ауыл перзенттері Әлия Көмекова мен Бауыржан Қадыкенов ерекше үлгі көрсетті. Олар балалар ойын алаңының аумағын көгалдандыру үшін қылқанжапырақты ағаш көшеттерін сатып алуға демеушілік жасап, игі іске ұйытқы болды.
Мұндай бастамалар өңірдің экологиялық жағдайын жақсартып қана қоймай, тұрғындардың табиғатқа деген жанашырлық көзқарасын нығайтуға септігін тигізеді. «Таза Қазақстан» бағдарламасы аясындағы жұмыстар алдағы уақытта да жалғасын тауып, елді мекендердің ажарын аша түспек.
