Жетісу облысында жыл басынан бері көлік құралдарын заңсыз қайта жабдықтау деректері тіркеліп отыр. Соның ішінде зауытта қарастырылмаған LED шамдарды орнату жағдайлары жиілеген, – деп хабарлайды 7-su.kz ақпараттық порталы.
Полиция мәліметінше, өңірде осы бағытта 109 құқық бұзушылық анықталған. Ең көп кездесетін заңсыз өзгерістердің бірі – көлікке рұқсатсыз жарықдиодты шам орнату.
Мамандардың айтуынша, сырт көзге мұндай шамдар заманауи әрі тиімді көрінгенімен, олардың жол қауіпсіздігіне кері әсері айтарлықтай. Зауыт талаптарына сәйкес келмейтін өзгерістер көліктің жарық жүйесінің дұрыс жұмыс істеуін бұзады. Соның салдарынан қарсы бағытта келе жатқан жүргізушілердің көзі қарығып, жолдағы көріну деңгейі төмендейді. Әсіресе түнгі уақытта бұл жол-көлік оқиғаларының қаупін арттырады.
Автокөлік өндірушілері жарық жүйесін әзірлеу барысында фаралардың бұрышы, жарықтың қарқындылығы мен таралуы сияқты бірқатар маңызды факторды ескереді. Ал талапқа сай орнатылмаған LED шамдар жарықтың ретсіз шашырауына әкеліп, қауіпті жағдай туғызады.
Полиция өкілдері зауытта қарастырылмаған LED шамдардың жол қауіпсіздігіне нақты қауіп екенін ескертеді. Әрбір бөлшек арнайы тексерістен және сертификаттаудан өтетіндіктен, өз бетінше енгізілген өзгерістердің салдары ауыр болуы мүмкін.
Құқық қорғау органдары мұндай заң бұзушылықтар тек апатты жағдайларға әкеліп қана қоймай, қолданыстағы заң талаптарын бұзу екенін атап өтті. Ережелерді елемейтін жүргізушілер өз өмірін ғана емес, өзгенің де қауіпсіздігін қатерге тігеді.
Жетісу облысында рейдтік іс-шаралар алдағы уақытта да жалғасады. Негізгі мақсат – көлік құралдарын заңсыз қайта жабдықтаудың алдын алу және жол қозғалысына қатысушылар үшін қауіпсіз орта қалыптастыру.
