Ұлттың жаны – тіл. Ол рухтың өзегі, халықтың кешегі шежіресі мен бүгінгі болмысының алтын арқауы. Қай жұрттың да келбеті, дүниетанымы мен мәдениеті ең әуелі өз ана тілі арқылы айқын бедерленеді. Сол себепті туған сөздің тұғыры әрдайым биікте тұруы елдіктің өлшемі.
Қазақтың ана тілі ғасырлар қойнауынан жеткен қастерлі қазына. Онда ата-баба үні бар, уақыттың таңбасы бар, ұрпақтың ізі бар. Әрбір ұғым, әрбір тіркес терең таным мен тұнық даналықтың көрінісі. Халықтың салт-санасы, тұрмыс-салты, дүниеге көзқарасы бәрі де осы асыл мұра арқылы бүгінгі күнге жетіп, сананы жаңғыртып отыр.
Туған сөздің мәртебесін асқақ ұстау – оны ардақтаудан бастау алады. Қадірін ұғыну өз тегіңді тану, өткеніңе тағзым ету, болмысыңды сақтау. Қазіргі кезеңде кейбір жас буынның өзге жұрттың сөзіне көбірек мойын бұруы байқалады. Замана ағымы ықпал етпей тұрмайды. Дегенмен, ұлттық негізді әлсіретпеу – әр азаматтың азаматтық ұстанымы болуға тиіс.
Бүгінгі таңда мемлекеттік мәртебеге ие болған қазақ тілі қоғамның сан саласында кеңінен қолданылып келеді. Білім мен ғылымда, мәдениет пен ақпарат кеңістігінде оның өрісі кеңейіп, өркені өсіп отыр. Бұл – тәуелсіз елдің еңсесін тіктеген маңызды жетістіктің бірі.
Ана тілі – тірі құбылыс. Ол уақытпен бірге түлеп, заман ырғағына бейімделіп отырады. Алайда өзегін жоғалтпау – басты шарт. Сондықтан әрбір жан өз ана тілін жетік меңгеріп, күнделікті тіршілікте еркін қолдануға машықтануы қажет. Отбасындағы қарым-қатынас, бала тәрбиесі, рухани орта, бәрі де осы асыл мұраның келешегін айқындайтын негізгі тіректер.
Қорытқанда, туған сөздің тұғырының биіктігі әрқайсымыздың ниетіміз бен әрекетімізге байланысты. Оны ардақтау, қастерлеу, келер ұрпаққа аман жеткізу қасиетті парыз. Сөз бар жерде ұлт бар. Ұлт бар жерде – мәңгілік рухтың алауы сөнбейді.
Айдана МАМАНҚЫЗЫ,
«Жетісу облысының «Тіл» оқу-әдістемелік орталығы»
Ақсу аудандық филиалының мемлекеттік тіл оқытушысы
