Қазақстанның Халық әртісі, танымал театр режиссері әрі ұлағатты ұстаз Есмұхан Обаев дүниеден озды.
Мәдениет және ақпарат министрлігі таратқан хабарламада Есмұхан Несіпбайұлының ұлттық мәдениетті ілгерілетудегі өлшеусіз еңбегі ерекше атап өтілді. Ведомство таратқан мәлімдемеде:
«Есмұхан Несіпбайұлы саналы ғұмырын қазақ театр өнерін дамытуға, сахна мәдениетін қалыптастыруға, ұлттық режиссура мен актерлік мектептің іргетасын нығайтуға арнаған көрнекті тұлға еді», – деп көрсетілген.
Министрлік өкілдері оның шығармашылық мұрасы мен мәдениетке қосқан қомақты үлесі халық жадында мәңгі сақталатынын ерекше атап өтті.
Есмұхан Обаев 1941 жылғы 23 маусымда Алматы облысының Кеген ауылында дүниеге келген. 1964 жылы Алматы мемлекеттік консерваториясын Халық әртісі Асқар Тоқпановтың класы бойынша тәмамдаған. Оның кәсіби жолы сан қырлы белестерден тұрады. Режиссерлік қызметін Мұхтар Әуезов атындағы академиялық драма театрында бастап, Мәскеудегі МХАТ театрында тағылымдамадан өткен. Кейіннен Семейдегі Абай атындағы қазақ драма театрының көркемдік жетекшісі әрі бас режиссері қызметтерін атқарып, аймақтағы театр өнерінің өркендеуіне зор ықпал етті.
Тұлғаның басқарушылық қабілеті де жоғары деңгейде болды. Ол Темірбек Жүргенов атындағы Алматы театр-көркемсурет институтының ректоры, Қазақстанның Мәдениет министрінің орынбасары лауазымдарын атқарған. Ал 2001-2013 жылдар аралығында Мұхтар Әуезов атындағы Қазақ мемлекеттік академиялық драма театрын басқарып, қара шаңырақтың репертуарын жаңа белестерге көтерді. Оның шәкірттері бүгінде еліміздің түкпір-түкпіріндегі театрларда жемісті еңбек етіп жүр.
Оның еңбегі мемлекет тарапынан лайықты бағаланып, «Парасат», «Барыс» ордендерімен марапатталған, «Тарлан» тәуелсіз сыйлығының лауреаты атанған. Есмұхан Обаев сахналаған «Абай», «Қарагөз», «Айман – Шолпан», «Ревизор», «Шыңырау түбінде» және «Асауға тұсау» сияқты ондаған қойылымдар қазақ театрының алтын қорына енді. Ұлттық режиссураның мектебін қалыптастырған бірегей тұлғаның қазасы бүкіл қазақ жұртының қабырғасын қайыстырды.
«Жетісу-Ақпарат»
