Бүгінгі таңда облыс бойынша 8 мыңға жуық пациент қатерлі ісік диагнозымен есепте тұр. Олардың ішінде сүт безі қатерлі ісігіне шалдыққан 1 613 адам, жатыр мойны обыры анықталған 600 әйел және колоректальды ісігі бар 557 науқас бар. Бұл туралы Жетісу облыстық көпсалалы клиника директоры Мадияр Өмірбаев мәлімдеді.
Өңірдегі профилактикалық жұмыстардың нәтижесінде 2025 жылы скринингтік жоспар 93,1 пайызға орындалған. Бұл көрсеткіш халықтың денсаулыққа деген жауапкершілігі мен медициналық қамтудың жоғары деңгейде екенін көрсетеді. Әсіресе, әйелдер денсаулығына ерекше көңіл бөлініп отыр. Мәселен, өткен жылы жатыр мойны қатерлі ісігін анықтау мақсатында 25 мыңнан астам әйел тексеруден өтіп, нәтижесінде 20-ға жуық дерт ерте анықталған. Сондай-ақ, маммографиялық зерттеулердің арқасында 85 сүт безі ісігінің белгілері ерте сатысында табылды.
Жыл басынан бері маммографиядан өтіп, қатерлі ісікті ерте сатысында нақтылаған әйелдердің саны артты. Сонымен қатар, цитологиялық зерттеулер арқылы 200-ден астам ауру белгілері тіркелді. Колоректальды обырды ерте анықтау мақсатында гемокульт-тест жүргіздік. 174 адамнан оң нәтиже анықталып, олардың 103-і толық колоноскопиялық тексеруден өтті. Нәтижесінде барлық пациентке шұғыл медициналық көмек көрсетіле бастады, – дейді Мадияр Өмірбаев.
Спикердің айтуынша, ісік алды жағдайындағы барлық пациент диспансерлік бақылауға алынып, қажетті ем қабылдап жатыр. Маман скринингтік тексерулердің басты мақсаты – ауруды асқындырмай, емдеуге болатын сатыда анықтау екенін айтты. Дәрігерлер адамдарды өз денсаулығына бей-жай қарамауға және тегін скринингтік бағдарламадан уақтылы өтуге шақырады.
Мақпал Әділханқызы
