Жаһандану және цифрлық технологиялардың қарқынды дамуы жағдайында білім беру саласындағы халықаралық ынтымақтастықтың рөлі ерекше. Киберқауіпсіздік және криптология кафедрасы бұл бағытты белсенді түрде дамытып, жыл сайын шетелдік және отандық тыңдаушылар үшін қысқы және жазғы мектептер ұйымдастырады. Бұл білім беру жобалары ақпараттық қауіпсіздік саласындағы білім, тәжірибе және заманауи практикалармен алмасудың маңызды алаңына айналуда.
Әл-Фараби атындағы Қазақ ұлттық университетінің Ақпараттық технологиялар және жасанды интеллект факультеті базасында киберқауіпсіздік және криптология кафедрасының ұйымдастыруымен жыл сайын тыңдаушыларға арналған қысқы және жазғы мектептер өткізіледі. Мектеп бағдарламалары ақпаратты қорғау және киберқауіптерге қарсы іс-қимыл саласында кәсіби құзыреттерді қалыптастыруға бағытталған. Курстар аясында қатысушылар киберқауіпсіздік негіздерін, заманауи кибершабуыл түрлерін, операциялық жүйелер мен желілік инфрақұрылымды қорғау әдістерін, сондай-ақ, деректерді криптографиялық қорғау технологияларын меңгереді. Практикалық дайындыққа және қауіпсіздікті қамтамасыз етудің заманауи құралдарымен жұмыс істеуге ерекше көңіл бөлінеді.
Оқыту онлайн және офлайн сабақтарды ұштастыратын икемді форматта ұйымдастырылады, бұл материалды тиімді меңгеруге және қатысушылар арасындағы өзара әрекеттестікті арттыруға мүмкіндік береді.
Киберқауіпсіздік және криптология кафедрасының ұйымдастыруымен И. Раззаков атындағы Қырғыз мемлекеттік техникалық университетінің 590100 «Ақпараттық қауіпсіздік» мамандығының 3-курс студенттеріне арналған «Ақпараттық жүйелердегі киберқауіпсіздік» атты қысқы мектеп өтті. 72 сағаттық білім беру бағдарламасы ақпаратты қорғау және киберқауіптерге қарсы іс-қимыл саласында заманауи кәсіби құзыреттерді қалыптастыруға бағытталды.
Курс барысында қатысушылар киберқауіпсіздік негіздерін, кибершабуылдардың заманауи түрлерін, Windows және Linux операциялық жүйелерін қорғау тетіктерін, желілік қауіпсіздікті қамтамасыз ету құралдарын меңгерді. Деректерді крипто-графиялық қорғау, ақпараттық қауіпсіздік инциденттерін басқару және қауіпсіздікті мониторингтеу технологияларына, соның ішінде SIEM жүйелеріне ерекше назар аударылды.
Жыл сайын екі рет өткізілетін қысқы және жазғы мектептер кафедрадағы мамандар даярлау деңгейінің жоғары екенін және халықаралық білім беру кеңістігін дамытуға деген ұмтылысын айқындайды. Мұндай бастамалар цифрлық трансформация жағдайында тиімді жұмыс істей алатын және халықаралық деңгейде ақпараттық жүйелердің қауіпсіздігін қамтамасыз ететін бәсекеге қабілетті мамандарды даярлауға ықпал етеді.
Ә. ТҰРАРБЕК,
әл-Фараби атындағы ҚазҰУ-дің
киберқауіпсіздік және криптология кафедрасының меңгерушісі
Г. ЖИДЕКУЛОВА,
киберқауіпсіздік және криптология кафедрасының доценті
М. КЕНЖЕБАЕВА,
киберқауіпсіздік және криптология кафедрасының доцент м.а.
