Оқу-ағарту министрлігі биыл 8000-нан астам «Алтын белгі» төсбелгісін дайындау үшін бюджеттен 231,3 млн теңге бөледі, – деп хабарлайды 7-su.kz ақпараттық порталы.
Еліміздің бас ұстаханасы – Монета сарайы бұл тапсырысты мамыр айының соңына дейін аяқтауды жоспарлап отыр. Айта кетерлігі, соңғы жылдары үздік шәкірттерге берілетін нышанның бағасы айтарлықтай қымбаттаған. Мәселен, бір ғана төсбелгінің құны қазіргі таңда 27 695 теңгені құрайды. Салыстырмалы түрде қарасақ, 2023 жылы бұл көрсеткіш 16 520 теңге деңгейінде болатын.
Үздік оқушылар санының артуы байқалады. Егер өткен жылы 5500 төсбелгіге тапсырыс берілсе, биыл бұл көрсеткіш 8000-нан асып түсті. Мұндай өсім білім сапасының артуы немесе бағалау жүйесіндегі өзгерістермен байланысты болуы мүмкін. Алайда, қоғамда бұл марапаттың маңыздылығы төңірегінде пікірталас толастамай тұр.
Көптеген ата-аналар мен оқушыларды «Бұл белгі оқуға түсуге көмектесе ме?» деген сұрақ мазалайтыны анық. Министрлік өкілдері атап өткендей, қазіргі уақытта «Алтын белгі» иегерлеріне жоғары оқу орнына түсу кезінде айрықша артықшылықтар қарастырылмаған. Тек екі талапкердің грантқа үміткер ретінде ұпайлары тең түскен жағдайда ғана, төсбелгісі бар балаға басымдық беріледі.
Бұл қадам білім беру жүйесін әділ әрі ашық етуге бағытталған. Осылайша, мемлекеттік гранттарды бөлу кезінде тек оқушының ҰБТ-да жинаған нақты білімі мен ұпайы басты рөл атқарады.
