Проактивті қызмет қалай жұмыс істейді, оның қызмет түрлері туралы Б. Құранбек атындағы Журналистер үйінде өткен баспасөз мәслихатында Халықты әлеуметтік қорғау саласындағы реттеу және бақылау комитетінің Жетісу облыстық департаментінің басшысы Зайда Илимжанова мәлім етті.
Спикер сөзінше, бұл жүйе азаматтың қызметке құқығын мемлекеттік органдардың деректер базасы арқылы растайды. Екіншіден, азаматтың мобильді нөміріне қызмет туралы ақпарат және келісім алу үшін SMS жіберіледі. Үшіншіден, келісім алынғаннан кейін электронды өтініш тіркеледі. Төртіншіден, қызмет нәтижелері, оның ішінде төлем сомасы, өтініш берушінің нөміріне SMS арқылы жіберіледі. Осылайша, азаматтардың мобильдік базасында тіркелуі қызметтерді кезексіз ақпараттық жүйе арқылы тиісті органдарға жүгінбей-ақ, мемлекеттік қолдаудың қандай да бір түрін алуға мүмкіндік береді.
– Мемлекеттік органдардың ақпараттық жүйелерінен Қазақстан Республикасының заңнамаларымен айқындалған негіздер бойынша әлеуетті мемлекеттік қызметті алушының мемлекеттік қызметті алу құқығын растайтын мәліметтер түскен жағдайда, ҚР Еңбек және халықты әлеуметтік қорғау министрлігінің ақпараттық жүйесі мобильді азаматтар базасына тіркелген ұялы байланыс нөмірінің бар болуына сұрау жолдайды. 2024 жылы департамент 16 түрлі мемлекеттік қызмет бойынша 38 396 қызмет көрсетті. Оның ішінде 11 түрлі төлем бойынша 8 447 төлем проактивті түрде тағайындалды. Жыл басынан проактивті нысанда 237 төлем тағайындалды, – деді Зайда Абдымананқызы.
Жиын соңында спикер БАҚ өкілдерінің қойған сауалдарына жауап берді.
С. БАЗАРҚҰЛОВА
