Жетісу облысының су айдындарында көктемгі балық аулауға тыйым салынды. Биыл климаттық өзгерістерге байланысты кейбір нысандарда шектеу уақыты өзгерген. Бұл туралы Журналистер үйінде өткен баспасөз мәслихатында «Балқаш-Алакөл облысаралық бассейндік балық шаруашылығы инспекциясы» РММ басшысы Ринат Құмашев мәлімдеді.
Балық ресурсының табиғи жолмен өсіп-өнуіне жағдай жасау мақсатында облыс аумағындағы өзен-көлдерде балық аулауға қатаң шектеу қойылды. Атап айтқанда, Қаратал, Ақсу, Лепсі және Аягөз өзенінде, сондай-ақ осы өзендердің Балқаш көліне құяр сағасынан бастап 5 шақырым радиуста балық аулауға 15 сәуір мен 1 маусым аралығында тыйым салынған. Ал Балқаш көлінің шығыс бөлігінде, яғни Ұзынаралдың оңтүстік жиегінен Аягөз өзенінің сағасына дейінгі аумақта тыйым салу мерзімі 25 сәуір мен 10 маусым аралығын қамтиды.
Балқаш көлінің шығыс бөлігінде (Ұзынаралдың оңтүстік шетінен Аягөз өзенінің сағасына дейін) – 25 сәуір мен 10 маусым аралығында балық аулауға болмайды.
Осыған орай, облыс көлемінде дәстүрлі «Нерест» табиғат қорғау акциясы да басталды. Инспекция мамандары жергілікті атқарушы органдар және құқық қорғау құрылымдарымен бірлесіп күшейтілген режимде жұмыс істеуге көшті. Су айдындарында рейдтік шаралар жиілеп, тасжолдарда уақытша бекеттер орнатылуда.
Уылдырық шашу кезеңінде табиғат қорғау заңнамасын бұзғаны үшін әкімшілік және қылмыстық жауапкершілік қарастырылған. ҚР Әкімшілік құқық бұзушылық туралы кодексінің 383-бабына сәйкес, балық аулау қағидаларын бұзу 10-нан 250 айлық есептік көрсеткішке дейін айыппұлға және құқық бұзушылық құралдарын тәркілеуге әкеп соғады. Ал Қылмыстық кодекстің 335-бабы бойынша 6000 АЕК-ке дейін айыппұл салу немесе 3 жылдан 6 жылға дейін бас бостандығынан айыру жазасы қолданылуы мүмкін, – деді Ринат Құмашев.
Статистикаға сүйенсек, «Нерест-2025» акциясының нәтижесінде 94 заң бұзушылық анықталған. 90 адам әкімшілік жауапқа тартылса, 4 материал құқық қорғау органдарына жолданды. Заңсыз әрекеті үшін құрықталғандарға 1,9 млн теңге айыппұл салынып, балық қорына келтірілген зиян үшін 2,1 млн теңгеге талап-арыз қойылған. Сондай-ақ, 25 тыйым салынған құрал мен 4 су көлігі тәркіленді.
Балықтардың уылдырық шашу орындарына еркін жетуін қамтамасыз ету үшін өзендерді заңсыз аулардан тазарту жұмыстары да жүргізіліп жатыр. Жақында Лепсі өзенінде өткен «Таза су айдындары» акциясына еріктілер мен жергілікті тұрғындарды қосқанда 30-дан астам адам қатысты. Акция нәтижесінде су бетінен 150 метрден астам заңсыз ау алынып, жағалаудан 1,4 тонна тұрмыстық қалдық шығарылды.
Инспекция өкілдері бақылау шаралары Балқаш-Алакөл бассейніндегі барлық су айдындарында тұрақты түрде жалғасатынын жеткізді.
Мақпал Әділханқызы
