Талдықорған іргесіндегі Алдаберген ауылында бұл күнге дейін орталықтандырылған ауызсу жүйесі болмаған. Тұрғындар тіршілік нәрін аулаларындағы құдықтан алып келген еді. Қазіргі уақытта ауылдағы 350 отбасы жаңа су құбырына қосылса, қалған 495 шаңырақ үйлеріне су кіргізудің әрекетімен жүр.
Алдаберген елді мекенінде 3810 адам тұрады. Халық орталықтандырылған ауызсу жүйесіне қосылып, үйлеріне су кіргізгенге қуанышты. Оның бірі – Зинаида Арғынбаева. Кейуана қаншама жылдан бері тіршілік нәрін есік алдындағы құдықтан басып шығарып, тасып келген. Қыс болса ол құдық та қатып қалатын көрінеді. Енді қиыншылықтың бәрі артта қалды.
– Міне, ыстық, суық суға да қолымыз емін-еркін жетіп отыр. Суды даладан немерем екеуміз таситынбыз. Ол машақаттан да құтылдық. Осы ізгі істің басы-қасында жүрген азматтарға айтар алғысым шексіз. Ең бірінші еліміз тыныш болсын, – дейді Зинаида Арғынбаева.
Алдаберген ауылындағы су құбырын қайта жаңғырту үшін республикалық бюджеттен 791,2 млн. теңге бөлінген. Оның 721,7 млн. теңгесі игеріліп, бүгінгі таңда 29 шақырым су құбыры тартылды. Сондай-ақ, өткен жылдың қыркүйегінде облыстық мәслихат сессиясында құрылыс насанын аяқтауға 69,5 млн. теңге бөлінді. Бүгінде асфальт төселіп, орталық су мұнарасын абаттандыру жұмыстары жүргізілуде.
– Қазіргі таңда облыс бойынша 358 елді мекеннің 327-сі су құбыры жүйелерімен орталықтандырылған. Оның 24-і ауызсу жүйесімен орталықтандырылмаған, жетеуі тасымалданатын сумен қамтамасыз етіліп отыр. Биыл 21 нысанның құрылысы мен қайта жаңартылуын аяқтау жоспарлануда. Нәтижесінде, жыл соңына дейін 267 шақырым желі салынып, орталықтандырылған су жүйесіне Алакөл ауданының Қоңыр ауылы, Қаратал ауданының Ұмтыл ауылы және Ақсу ауданының Қопа ауылы, Панфилов ауданының Жиделі ауылы қосылады, – дейді энергетика және тұрғын үй-коммуналдық шаруашылық басқармасы басшысының орынбасары Азамат Бейсбаев.
Айта кетейік, 2025 жылы ауызсудың сапасын жақсарту үшін 26,6 млрд. теңгеге 20 жоба әзірленген. Оны нақтылауға бюджеттік өтінім ҚР Өнеркәсіп және құрылыс министрлігіне ұсынылып отыр. Жобаларды іске асыру нәтижесінде өңірдің 20 елді мекенінде 630 шақырым сумен жабдықтау желілері қайта жаңартылатын болады.
Медет ЖҰМАБАЙ
Суретті түсірген Жұмабай МҰСАБЕКОВ
