«Бақытты отбасы» партиялық жобасы аясында «AMANAT» партиясы Жетісу облыстық филиалының бастамасымен тұрғындардың әлеуметтік мәселелерін шешуге бағытталған жүйелі жұмыстар жалғасуда. Әлеуметтік осал санаттағы азаматтарды қолдауға және олардың өтініштеріне жедел әрекет етуге ерекше назар аударылуда.
Партия филиалының қоғамдық қабылдауына Талдықорған қаласының тұрғыны Ирина Құрманбаева үйіне табиғи газ тартуға көмек көрсету туралы өтінішпен жүгінді. Ол мүмкіндігі шектеулі баланы жалғыз тәрбиелеп отыр. Жұбайы қайтыс болғаннан кейін барлық жауапкершілік оның мойнына жүктелген. Көп жылдан бері отбасы тұрмыстық қиындықтарға тап болып, үйге газ тарту мәселесі олардың шешімін таппай келген өзекті мәселелерінің бірі еді.
Аталған өтініш «AMANAT» партиясының бақылауына алынып, жан-жақты қарастырылды. Нәтижесінде Талдықорған қалалық мәслихатының депутаты Ыбрай Даутовтың, сондай-ақ облыстық мәслихат депутаты Руслан Валишановтың қолдауымен бұл мәселе оң шешімін тапты. Бірлескен күш-жігердің арқасында 1,5 миллион теңге көлемінде жұмыстар жүргізіліп, өтініш берушінің үйі көгілдір отынға қосылды.
Жұмыстарды «ҚазТрансГаз Аймақ» АҚ-ның Жетісу өндірістік филиалы мен «Жетісу Газ Сервис» ЖШС мамандары сапалы әрі жедел орындады. Осылайша отбасының негізгі мәселелерінің бірі шешімін тауып, тұрмыс жағдайы айтарлықтай жақсарды.
Бұл жағдай «Бақытты отбасы» жобасының тиімділігін айқын көрсетті. Алдағы уақытта да партия мұқтаж отбасыларға атаулы көмек көрсетіп, олардың тұрмыс жағдайын жақсарту ісін жалғастыра бермек.
