Қазақстанда университеттердің ұлттық рейтингі жарияланбақ. Бұл туралы Парламент Мәжілісінде жоғары білімді кадрларды даярлау мәселесіне арналған Үкімет сағатында ҚР Ғылым және жоғары білім министрі Саясат Нұрбек мәлімдеді, – деп хабарлайды 7-su.kz ақпараттық порталы.
– Бірнеше жыл бұрын сапасыз университеттерді қысқарту жұмысы басталған еді. Бұл жұмысты жалғастырып жатырмыз, яғни Ақтөбеде, Шымкентте, Атырауда сапасыз білім беріп жатқан ЖОО-лардың лицензиясы жойылды. Осы жылдан бастап тиісті талаптар заңнамаға енгізілді. Биылдан ұлттық рейтинг енгізіледі, алғаш рет оны осы жылы жариялаймыз. Былтыр оны пилоттық форматта өткіздік, – деді Саясат Нұрбек.
Министрдің айтуынша, енгізіліп жатқан өзгерістер жекеменшік университеттер арасында алаңдаушылық туғызуда.
– Осындай қадамға бардық. Енді мемлекеттік грант пен тапсырыс ұлттық рейтингпен ұштастырылады. Рейтингке ілікпеген, халықаралық форматта жұмыс істемейтін, инвестиция құймайтын, зертханалар құрмайтын университеттерге қаржыландыру мүлдем тоқтатылады. Сондықтан біртіндеп нарықтық ұстанымдар қосылады. Рейтинг мәліметтері ата-аналарға, талапкерлерге кеңінен таратылады, – деді министр.
