Ертең – Қазақстан халқының бірлігі күні. Елімізде бұл мереке татулық пен ұлттар арасындағы достықтың символы ретінде аталып өтеді, – деп хабарлайды 7-su.kz ақпараттық порталы.
2026 жылғы 1 наурыздағы мәлімет бойынша, Қазақстан халқының жалпы саны 20 532 240 адамға жетті. Ұлттық статистика бюросы елдегі этностық құрамға қатысты жаңартылған деректерді ұсынды.
Қазақстандағы ең ірі этнос – қазақтар. Олардың саны 14 664 202 адамды құрайды. Екінші орында орыстар – 2 943 022 адам. Үшінші орында өзбектер – 695 557.
Сондай-ақ елде украиндар (367 547), ұйғырлар (309 164), немістер (222 890), татарлар (218 361), әзірбайжандар (157 568), кәрістер (120 821), түріктер (93 234), дүнгендер (88 165), беларустар (73 788), тәжіктер (61 307), күрдтер (52 077) және қырғыздар (41 459) тұрады.
Өңірлік бөлініске келсек, қазақтардың ең көп шоғырланған аймағы – Түркістан облысы, мұнда 1,6 млн-нан астам қазақ тұрады. Орыстардың басым бөлігі Алматы қаласында шоғырланған – шамамен 428 мың адам. Өзбектердің негізгі бөлігі де Түркістан облысында тұрады – 404 мың.
Украиндардың көбі Қостанай облысында – 83 мың адам. Ұйғырлардың негізгі бөлігі Алматы қаласында тіркелген – 124 мың.
Қазақстан халқының этностық алуандығы елдегі қоғамдық келісім мен бірліктің маңызды негіздерінің бірі саналады.
