Қазақстанда оқушылардың денсаулығына қатысты ауқымды халықаралық зерттеу басталды, – деп хабарлайды 7-su.kz ақпараттық порталы.
Еліміздің барлық өңірінде 5, 7 және 9-сынып оқушылары «Мектеп жасындағы балалардың денсаулыққа қатысты мінез-құлқы» (HBSC) жобасына қатысуда. Бұл зерттеу Дүниежүзілік денсаулық сақтау ұйымымен (WHO) бірлесіп жүзеге асырылады және мектеп оқушыларының денсаулығын зерттеуге арналған ең ірі халықаралық жобалардың бірі саналады.
HBSC зерттеуі төрт жыл сайын бірыңғай халықаралық хаттама негізінде өткізіледі. Биылғы кезеңге әлемнің 51 елі қатар қатысып отыр. Қазақстан бұл жобаға үшінші рет қосылып отыр. Бұған дейін зерттеу 2018 және 2022 жылдары жүргізілген.
ҚР Денсаулық сақтау министрлігінің мәліметінше, зерттеу аясында оқушылардың физикалық және психикалық денсаулығы, тамақтану дағдылары, дене белсенділігі, ұйқы сапасы, зиянды әдеттері, сондай-ақ буллинг пен кибербуллинг мәселелері қамтылады. Сонымен қатар, мектеп ортасы, ата-аналармен және құрдастарымен қарым-қатынас, цифрлық мінез-құлық және әлеуметтік әл-ауқат деңгейі де зерделенеді.
Ведомствоның хабарлауынша, жиналған деректер балалар мен жасөспірімдердің денсаулығын сақтау және нығайтуға бағытталған мемлекеттік саясатты жетілдіруде, сондай-ақ профилактикалық бағдарламаларды жоспарлау мен бағалауда қолданылады.
