Ақсу халқы тағылымы терең, рухани әрі спорттық маңызы жоғары шараның куәсі болды. Ауданның ардақты азаматы, ұзақ жылдар бойы шәкірт тәрбиелеген білікті ұстаз, спорт ардагері Аюхан Айдабаевтың құрметіне баскетболдан ардагерлер арасында турнир ұйымдастырылды. Бұл жарыс тек спорттық бәсеке ғана емес, ұрпақтар сабақтастығын жалғаған, саламатты өмір салтын насихаттаған және ұстазға деген құрметті айшықтаған мазмұнды іс-шараның көрінісі.
Турнирге төрт команда қатысып, өзара мықтыны анықтады. Атап айтқанда, Алматы қаласынан келген жерлестерден құралған «Алматы» командасы, Жансүгіров ауылының ардагерлері, Ақсу ауылдық округінің «Қосағаш ардагерлері» және «Қапал» құрамасы тартысты ойын көрсетті. Әр команда өз тәжірибесі мен шеберлігін ортаға салып, жанкүйерлерге әсерлі сәттер сыйлады. Жарыстың ашылу салтанатында алғашқы сөзді аудан әкімінің орынбасары Ғазиз Есжанов алып, турнирдің маңызына тоқталып, қатысушыларға сәттілік тіледі. Сонымен қатар,спорт ардагері Ұлан Хасенұлы, ардагер спортшы Жұмабек Рамазанов, жарыстың бас төрешісі Талғат Боранбайұлы, сондай-ақ, Аюхан ағаның туыстары – Роза Мұханқызы мен Динара Аюханқызы жүрекжарды тілектерін білдірді. Турнирде саналы ғұмырын білім мен спортқа арнаған ұстазға тағзым етілді. Тартысты өткен ойын қорытындысы бойынша І орынды «Қосағаш ардагерлері» командасы жеңіп алды. ІІ орын алматылық қонақтарға бұйырса, ІІІ орын Жансүгіров құрамасына тиді. Қапал командасы төртінші орынды місе тұтты.
Аюхан Мұханұлы Ақсу ауданында дүниеге келген. Ол Қ. Сәтбаев атындағы орта мектепті тамамдап, Алматыдағы денешынықтыру институтында оқыған. Еңбек жолын Чапаев атындағы орта мектепте бастап, 40 жыл бойы ұстаздық қызмет атқарды. Оның тәрбиесін көрген шәкірттері бүгінде байрақты бәсекелерде ел намысын қорғап жүр.
Ұстаздың ұзақ жылғы еңбегі еленіп, «Отан» медалімен марапатталған. Отбасы да өнегелі. Зайыбы Әния – зейнеткер ұстаз әрі өнерге жақын жан. Қызы Динара – Талдықорған қаласындағы №6 мектептің директоры, ал ұлы Жасұлан – кәсіпкер. Бүгінде әулеттен тараған немере-шөберелері өсіп келеді. Спорт – тек денсаулық кепілі емес, ол тәртіп пен табандылықтың, бірлік пен жігердің мектебі. Ардагерлердің алаңдағы белсенділігі жас буынға үлгі болды. Осындай мазмұнды шаралар көбейген сайын қоғамда саламатты өмір салты нығайып, ұрпақтар арасындағы рухани байланыс беки түсері анық.
Гүлжан МҰҚАШҚЫЗЫ
