Отан қорғаушылар күніне орай Қазақстандағы ер-азаматтардың саны мен әлеуметтік-демографиялық көрсеткіштері жарияланды, – деп хабарлайды 7-su.kz ақпараттық порталы.
Ресми деректерге сәйкес, елімізде 10 044 673 ер адам мерекеге орай құттықтау қабылдайды. Ерлердің өңірлер бойынша шоғырлануына назар аударсақ, ең жоғары көрсеткіш Алматы қаласы мен Түркістан облысында тіркелген – әрқайсысында шамамен 1,1 млн ер-азамат тұрады. Сонымен қатар, Алматы облысында 806,5 мың, ал Астана қаласында 785,4 мың ер адам бар.
Жас құрылымы бойынша ерлердің басым бөлігі еңбекке қабілетті жаста. Атап айтқанда, 16-60 жас аралығындағы азаматтар 56,5%-ды құрайды. Ал 0-15 жас аралығындағы ұл балалардың үлесі 30,2% болса, 61 жастан асқан ерлердің көрсеткіші 13,3%-ға жеткен.
Статистика ерлердің орташа жасы 31,1 жас екенін көрсетеді. Ал күтілетін өмір сүру ұзақтығы 72,19 жыл деңгейінде.
2025 жылғы дерек бойынша жұмыспен қамтылған халық ішінде ерлердің үлесі 51,6%-ды немесе 4,8 млн адамды құрайды. Оның ішінде жалдамалы жұмысшылар арасындағы үлесі 50,6% болса, өз бетінше жұмыспен қамтылғандар арасында бұл көрсеткіш 55,1%-ға жеткен.
Салалар бойынша қарастырғанда, ерлердің басым бөлігі өнеркәсіп саласында жұмыс істейді – 16,5%. Одан кейін көтерме сауда (14%), ауыл шаруашылығы (12,4%), сондай-ақ көлік және қойма саласы (11,1%) келеді.
Жеке кәсіпкерлер арасында ерлердің үлесі 54,7%-ды құрайды. Ал жұмыспен қамтылған ерлердің ең көп бөлігі 35-44 жас аралығында – шамамен 1,4 млн адам.
Осылайша, ресми статистика ер-азаматтардың ел экономикасындағы үлесі мен демографиялық құрылымын айқын көрсетіп отыр.
