Еліміздің білім беру ұйымдарында 108 мыңнан астам ер педагог еңбек етеді. Бұл туралы Оқу-ағарту министрлігі мәлімдеді, – деп хабарлайды 7-su.kz ақпараттық порталы.
Министрлікке қарасты Ахмет Байтұрсынұлы атындағы «Талдау» ұлттық зерттеулер және білімді бағалау орталығының дерегіне сүйенсек, Қазақстан бойынша білім беру ұйымдарында 108 572 ер мұғалім жұмыс істейді.
Мамандардың айтуынша, ер педагогтердің білім саласындағы рөлі ерекше. Олар оқушыларға сапалы білім берумен қатар, тәрбие мен жауапкершілік мәселесінде де маңызды үлес қосып келеді. Сондай-ақ, соңғы жылдары жастар арасында педагог мамандығына қызығушылық артып отырғаны байқалады.
Оның ішінде:
- мектептерде – 78 651
- колледждерде – 14 220
- қосымша білім беру ұйымдарында – 12 709
- мектепке дейінгі ұйымдарда – 2 690
- арнайы білім беру ұйымдарында – 302 ер адам қызмет етеді.
