Бүгінгі таңда Үшарал қаласындағы жолдардың жалпы ұзындығы 103,1 шақырымды құрайды, оның 75,8 шақырымы қатты жабынды.
Өткен жыл қалалық қызметтер үшін нәтижелі болды. Көлік жолдарын орташа жөндеу мен асфальттауға баса назар аударылды. Бұл жұмыстар жалпы 12 шақырымнан аса жолда жүргізілді. Мәселен, Жеңіс көшесінің 3,6 шақырымына асфальт төсеуге 190 млн. теңге бөлінді. Бірыңғай жоба аясында Бектұров, Бейбітшілік және З. Қойшыбаева көшелеріндегі 3,8 шақырым жол асфальтталды. Барлығы 85,7 млн. теңгеге Жамбыл көшесіндегі 2,3 шақырым жол жаңғыртылды. Ыдырышұлы және М. Мәметова көшелерінің біраз бөлігі жаңа жабынға ие болды. Осы екі нысан жұмыстарының жалпы құны 151 млн. теңгеден асты. Бұл жол қозғалысы қауіпсіздігін арттыруға мүмкіндік берді.
Ал биыл басталған нысандарды аяқтауға және жаңа учаскелерді жобалауға назар аударылып отыр. Негізгі басымдық – шұғыл араласуды қажет ететін көшелерге беріледі. Сондай-ақ, Момышұлы, Ыдырышев және Дүйсенов көшелерінің біраз учаскелерін асфальттау үшін 60,4 млн. теңгеге бюджеттік өтінім берілді. Т. Қарайғанов және Т. Нұрмұхамбетов көшелерінің жобалық-сметалық құжаттамасы мемлекеттік сараптама сатысында. Оң қорытынды алынғаннан кейін жұмыстар бірден басталады. С. Құсайынов көшесі маңызды нысан ретінде қарастырылады.
№1 А. Байтұрсынұлы атындағы мектеп маңы заманауи дренаждық жүйемен жабдықталады. Бұл еріген және жаңбыр суларының жиналуына байланысты туындаған көпжылдық проблеманы жоймақ. Қала билігі қазір жалпы ұзындығы 11,2 шақырымды құрайтын тағы 20 көшені асфальттауға арналған жобалық- сметалық құжаттама әзірлеуде. Тізімге орталық және шеткі Сәтбаев, Панфилов, Майлин, Төле би, тағы басқа да көшелер кірді. Бұл құжаттар қаржыландыруға өтінімдерді жедел беруге және қаладағы 27 шақырым топырақ жолдарды жоспарлы түрде азайтуға мүмкіндік бермек.
Айгүл БАЙБОСЫНОВА
Алакөл ауданы
