Жетісу жерінде соңғы жылдары жақсы дәстүр қалыптасты. Ол әр жыл сайын театр өнерінің майталмандары мен көрермен қауымды бір арнаға тоғыстыратын «BIKEN FEST» Халықаралық фестивалі. Театр өнерінің дамуына серпін беріп, шығармашылық ұжымдардың тәжірибе алмасу алаңына айналған фестиваль биыл да өз жалғасын тауып, Талдықорған төрінде төртінші рет шымылдығын түрді.
Облыс әкімінің қолдауымен өткен биылғы фестивальдің ашылу салтанаты да ерекше әсерге толы болды. Театр ғимаратына жиналған көрермендердің жүзінен өнерге деген құрмет пен мерекелік көңіл-күй анық сезілді. Әр тараптан келген театр қайраткерлері, режиссерлер, актерлер мен мәдениет саласының өкілдері бұл күнді үлкен рухани мереке ретінде қабылдады.
Фестивальдің ашылу салтанатына облыс әкімінің орынбасары Диас Есдәулетов қатысып, кеш қонақтарын құттықтап, өңірде мәдениет пен өнерді дамытуға ерекше көңіл бөлініп отырғанын атап өтті.
– Жетісу өңірі осымен төртінші жыл қатарынан театрдың дәстүрлі мерейлі мерекесін өткізіп отыр. «BIKEN FEST» фестивалі алғаш рет 2023 жылы Қазақстанның Халық әртісі Бикен Римованың 100 жылдық мерейтойына орай ұйымдастырылып, Жетісу өңірінің мәдени имиджін нығайтатын маңызды жобаға айналды. Осы 4 жыл ішінде бұл іс-шараға 6 мемлекеттен және еліміздің өңірлерінен барлығы 36 театр қатысты. Биылғы жылы Түркия, Грузия, Өзбекстан мемлекеттерінен және ел аймақтарынан 8 өнер шаңырағы келіп отыр, – деген ол өткен жылы театрға академиялық мәртебе берілгенін мақтанышпен айтып, өнер мерекесіне жиналған барша театр ұжымына шығармашылық шабыт және толағай табыс тіледі.
Мерекенің ашылуы көрермендерге тек фестивальдің басталғанын хабарлап қана қойған жоқ. Ол театрдың қоғам өміріндегі орнының ерекше екенін тағы бір мәрте айқындады. Өйткені сахна – адам тағдыры мен қоғамның тынысын бейнелейтін, халықтың жан дүниесін тәрбиелейтін рухани мектеп.
25-29 мамыр аралығында өтетін фестиваль аясында көрермендерді сан түрлі тағдыр, сан алуан мәдениет пен сан қырлы шығармашылық ізденістер күтіп тұр. Өнер мерекесі тағы да театрдың тіл мен шекара таңдамайтын, адам жүрегіне жол табатын құдіретті күш екенін дәлелдей түспек.
Бес күн бойы театр сахнасында Түркияның Painted bird театры, Өзбекстанның Қашқадария облыстық музыкалық драма театры, Грузияның И. Чавчавадзе атындағы Батуми мемлекеттік драма театры, Мемлекеттік академиялық қуыршақ театры, Жастар театры, Н. Жантөрин атындағы Маңғыстау облыстық музыкалық драма театры, Түркістан музыкалық драма театры, Шығыс Қазақстан облыстық драма және оперетта театры өнер көрсетеді.
ТАҚЫРЫПҚА ОРАЙ:
Котэ МЖАВИА, Илья Чавчавадзе атындағы Батуми мемлекеттік драма театрының көркемдік жетекшісі, директоры :
– Бұл фестивальге алғаш рет қатысып отырмыз. Мұндай өнер алаңының қаншалықты маңызды әрі қажетті екені айтпаса да түсінікті. Фестиваль аясында көрермен назарына «Джазда тек қана қыздар» атты музыкалық қойылымын ұсынбақшымыз. Мұндай шығармашылық кездесулер әр елдің театр ұжымдары арасында тәжірибе алмасуға, өнер арқылы рухани жақындасуға мүмкіндік береді.
Сарби ӘЙТЕНОВА
